F. Sotomonte

03 feb 2022 . Actualizado a las 05:00 h.

El Manifiestu académicu internacional pola oficialidá presentáu por Iniciativa pol Asturianu foi robláu por más de 300 profesores d'universidaes de tol mundiu.

Poro, ye un sofitu d'altu valir nunos meses nos que se fala de la Reforma del Estatutu d'Autonomía cola inclusión de la oficialidá nel so testu.

La UNESCO o'l Conseyu d'Europa tamién sofitaron la oficialidá  pa caltener la bayura llingüística milenaria d'Asturies. Cola garantía de la igualdá de la llingua na que s'esprese cada asturianu o asturiana.

El Manifiestu afita que toles llingües del mundiu tamién son una riqueza cultural a preservar y potenciar haza'l futuru, arriqueciéndola culturalmente. Que la oficialidá ye la fórmula llegal qu'establez la Constitución española pa salvaguardar los drechos de tolos falantes asturianos.

Tamién supón un llamáu a los partíos a negociar yá pa nun escosar los plazos. Ya iguar l'artículu 4 del Estatutu  pa la reconocencia de la realidá de les llingües n'Asturies.

Los 300, como na película del mesmu nome, puen asimilase a los guerreros espartanos que llograron derrotar al imperiu persa y torgar la entrada d'esti peles Termópiles a Grecia.

Pa ello foi preciso axuntar dempués a toles ciudades-estáu griegues qu'algamaron d'esti xeitu la victoria na defensa del so pueblu.

L'Academia de la Llingua Asturiana fizo un llamáu al Presidente Barbón pa la so implicación activa nel procesu. Nun val solo con afirmaciones públiques favoratibles a la oficialidá, sinón el trabayu na práutica que lleve a esi finxu cimeru. Lo mesmo pue dicise a Pumares, que vaiga al consensu no esencial y tamién pal restu los partíos presentes na Xunta Xeneral. Queda tiempu entá. Mientres, la Hestoria vixila esta oportunidá única de meyorar l'Estatutu.

Fai falta que seya con precuru ya intensidá pa realizar la Reforma nos pocos meses que queden enantes del branu. Nun se pue quedar esta cuestión nes encuestes ciudadanes, nin polítiques, yá que l'añu que vien hai eleiciones nel país. Que puen meyorar, o non,  los resultaos qu'afiten los 3/5 llegales de los diputaos, que son los qu'anguaño supónse que sofiten la oficialidá.

Los 300 profesores universitarios ponen na balanza el pesu positivu de la conocencia filolóxica internacional pal algame la oficialidá. Ye un pasu grande pa los drechos llingüísticos asturianos.  Con una oficialidá darréu nuna democracia más fonda n'Asturies.

Que como nos 300, quedarán na memoria hestórica de la evolución de la comunidá humana, nesti casu na d'esta parte d'Europa. Yá que nun pue ser que les minoríes tengan menos drechos que la mayoría nel Estáu español.