L'allugamientu de Córcega

OPINIÓN

Emmanuel Macron, este domingo, en su colegio electoral
Emmanuel Macron, este domingo, en su colegio electoral GONZALO FUENTESPOOL | EFE

06 jun 2022 . Actualizado a las 05:00 h.

El traductor de Google tien al corsu como una opción.Ye un idioma que nun ye oficial, pero paez a piques d'ello. L'asturianu nun apaez nes opciones, nuna situación asemeyada.

Faláu por unes 125.000 persones de les 322.000 censaes nel 2012, gocia de proteición en Córcega. Hebia 340.000 habitantes nel de 2019.

Anguaño, Scola Corsa tien dos escueles d'inmersión llingüística en corsu, idioma escolarizáu en toles estayes educatives incluyida la Universidá, magar tar amenazáu de desaniciu pola UNESCO.

Según el profesor eméritu de la Universidá, escritor y pioneru de la puesta en marcha del enseñu del corsu nos años 1980 y vinientes, Jacques Fusina, l'enseñu del corsu desendolcóse asgaya dende 1980. Pero l'enseñu nun ye enforma p'afitar la salvaguarda de la llingua güei.

Esto ye porque un enseñu inmersivu s'impón adulces nesta situación. Al mesmu tiempu, la sociedá paez que tien meyor conciencia de la desapaición de la tresmisión interxeneracional.

La mayoría rexonal apurre un sofitu financieru a la pedagoxía del corsu y tien votao el principiu de billingüismu corsu-francés.

La cooficialidá ye un finxu importante nesti cuadru inclusive si la idega de paridá ente dambes les dos llingües ye mal recibida pol gobiernu actual. O magar la idega de pueblu corsu como que semeya poner en riesgu la República francesa «una ya indivisible».

L'añu 2013 l'Asamblea de Córcega aprobó la cooficialidá del corsu, pero l'Asamblea Nacional Francesa nun-y dio'l preste.

Los partíos autonomistes y dixebriegos yá ganaron dos eleiciones consecutives con mayoría absoluta, que foi d'un 67,98% nes del 2021. Un fechu singular na Francia centralista.

Na cabera encuesta de Corse Matin fálase d'un 73% de ciudadanos favoratible a l'autonomía y d'un 32% a la dixebra.

El nacionalismu na islla taba hestóricamente dividíu pola violencia y una bayura de partíos. La llucha armada del Fronte de Liberazione Naziunale Corsu (FLNC) duró dende 1976 a 2014.

Agora, hai cambeos coles eleiciones presidenciales franceses de recién y el casu Yvan Colonna. Ésti foi acusáu de terrorismu pol atentáu nel que finó'l  prefeutu de Córcega o representante de Francia na islla. Foi apaliáu per venti minutos por un yih.adista y quedó trés selmanes en coma dica morrer. Col xeitu d'aparentemente probable crime d'estáu d'un independentista encarceláu nel continente, prodúxose la xunión de tolos coleutivos corsos, dende partíos propios y sindicatos, a la Università di Corsica.

Poro, Macron reculó y enclinóse a negociar la cooficialidá y más autonomía, como nel archipiélagu de Nueva Caledonia, pola mor de les protestes masives énte esti escándalu.

Miles de corsos averáronse al entierru del activista y a la so despidida, dempués de que la policía francesa cantara La Marsellesa como provocación a los moradores de la islla, que llueu atacaron les comisaríes de la policía.

El casu del corsu ta abiertu años dempués d'una antigua oficialidá francés-italianu enantes de la invasión francesa y de la inclusión del francés na Constitución como únicu idioma oficial: «La llingua de la República ye'l francés». 

Énte'l trunfu eleutoral de Macron, ábrense les negociaciones nun procesu hestóricu. Dende que Córcega, con Pasquale Paoli, foi una república independiente cola cooficialidá del italianu y el corsu, nel sieglu XVIII: La Ripublica Corsa, en corsu.