Les llinies demográfiques

OPINIÓN

F. Sotomonte

02 ene 2023 . Actualizado a las 05:00 h.

¿Somos munchos o pocos? 8.000 millones según la ONX. Y el númberu xube pesie a les calamidaes provocaes o non pola nuesa propia especie. Una guerra o un terrremotu quiten vides pero nun son a parar el xorrecimientu esponencial de la Humanidá. La meyora de les condiciones de vida, magar que desigualmente repartida ye basa de la evolución demográfica, ente otres causes.

El planeta nun ye quien a ufiertar los recursos que se consumen nun añu. Poro, como nuna película de ciencia ficción, anden a la gueta d’otros planetes p’asitiar l’escesu poblacional, entamando polos más ricos.

Al empar ye una mena de descreitu nun futuru vidable pa La Tierra. Un mou de safase de la gueta de soluciones al deterioru del llugar nel que viven millones de muyeres y homes.

Los llogros teunolóxicos nel espaciu paez que lleven esi camín.

Mientres, equí, dílese la identidá hestórica de los pueblos xunto coles sos llingües y cultures ancestrales.

La uniformidá ye acaldía mayor. Asina, Asturies como país recién de baxar del millón d’habitantes, yá fai un apueste pola inmigración a mediu plazu pa caltener la so continuidá como entidá estremada. Lo mesmo pue dicise d’Europa. Con 447 millones na Xunión Europea. El continente más vieyu, que precisa de nuevos xóvenes pa caltener les sos sociedaes. Pasó la dómina de la hexemonía mundial. Agora solo resiste la so cultura y los sos valires sociales pa tirar p’alantre. La democracia y los derechos humanos ente ellos.

La llinia demográfica xeneral sigue xubiendo exponencialmente mientres n’Europa baxa en delles fasteres. Mesmo nel nuesu país.

Paez urxente asimilar estes pautes col marcu competencial reforciáu, recursos y cola oficialidá que torgue la emigración de los d’equí (cuasi’l 20% los ñacíos asturianos vive fuera, de los que 150.000 nagüen por tornar) y encontie la integración de los que vienen, na cultura del país.

Nos años vinientes, xuégase’l desaniciu o la pervivencia d’esti pueblu, qu’entá tiene nes sos manes les erbíes pa siguir ente los demás. Como un llugar con nome nel mapa: Asturies.