La política de desmentíos continuos y enfrentamientos al rodiu del albuertu ente Mañueco, el presidente popular de Castilla y Lleón y el so vicepresidente, Garriga, del partíu de VOX, ye un culebrón que paez nun tener fin. Cinco díes depués de que’l presidente Mañueco permitiere que VOX anunciare que diba haber coacciones directes o indirectes a les muyeres embarazaes, Feijóo diz -énte’l revuelu de la sociedá en xeneral y de los xinecólogos en particular que carguen escontra les discriminatories propuestes antiabortistes qu’amuesen el pocu respetu a la llexislación vixente y a les muyeres que s'atopen nesa situación- que nada va camudar. Génova reconoz que’l gobiernu de coalición ente’l PP y VOX d’esa comunidá nun ye responsable y sensatu, que VOX metió-y un gol al PP na so estratexa, dando munición al PSOE, al que s’atreve a culpabilizar d’esti enguedeyu. VOX, que ta encantáu cola publicidá que ta xenerando esta noticia, diz que nun va dar «ni un paso atrás» y que’l protocolu va publicase n'hores, pero pasen los díes y de momentu nun hai nenguna novedá nesti tema. De toles formes, el refugu de VOX al derechu al albuertu va un pasu más allá d'encamentar a los médicos a que conviden a les xestantes a escuchar el llatíu del corazón del fetu y ver una ecografía 4D (en movimientu), yá que tamién ta a la escontra de que les muyeres puedan decidir por sí soles si albuerten, ensin cuntar cola opinión del home. Asina, estes midíes antibortistes propuestes nun son más que «un primer pasu», yá que si'l PP ganare les elecciones tán dispuestos a gobernar al llau del partíu ultra, polo que veríemos como eliminaríen munchos de los derechos que tanto costó implantar de les muyeres, del colectivu LGTBI y de munchos derechos que creyíemos consolidaos.
Too paez indicar que VOX copió'l protocolu de Castiella y Lleón de la llei antialbortista del ultra húngaru Orbán, porque les midíes que quería imponer son praúticamente iguales a la nueva llexislación del Gobiernu de Budapest qu’obliga a les muyeres a escuchar el llatíu del fetu enantes de decidir si atayen el so embarazu. Hai qu’alcordase de que la UE ta engarriada col presidente d’Hungría por mor del retrocesu democráticu nel país en derechos consolidaos como l’albuertu y poles midíes de represión a los sos oponentes políticos, periodistes, universidaes, organizaciones non gubernamentales.... Ello ye que, después de tres años d’alvertencies, retiénen-y alrodiu de 5.800 millones de euros en fondos de recuperación poscovid-19.
El problema ye que’l derechu de la muyer a decidir sobre'l so cuerpu tamién sufrió un gran revés en 2022 en tol mundu cola decisión del Tribunal Supremu d'Estaos Xuníos de derogar la sentencia que sirvía de base llegal pa la interrupción voluntaria del embarazu dende 1973. Per otru llau hai que recordar que Jaroslaw Kaczynsk, líder polacu del PIS (Llei y Xusticia), promocionó que’l desacreitáu Tribunal Constitucional de Polonia siguiendo les sos direutrices resolviere que l'albuertu en casu de defectu fetal grave y irreversible o enfermedá incurable qu'amenacie la vida del fetu yera contrariu a la Constitución. Per otru llau, la Ilesia polaca culpabiliza a la ideoloxía de xéneru de la crisis de la familia, la sexualización de la infancia y hasta los casos de pedofilia. Pero nun podemos escaecemos de les declaraciones del qu’hasta va unes meses fuere obispu de San Sebastián que llegó a dicir que l’albuertu suponía un «holocaustu silenciosu» y que defendiere nun albortar inclusive cuando hubiere violación pues «la segunda víctima del albuertu ye la mesma muyer», porque amás de nun finar cola inxusticia d’acabar con una vida inocente, ye "una especie de suicidiu espiritual" per parte de l'afectada.
Asina pues, les muyeres reclamen llibertá dende va sieglos pa practricar l’albuertu, una llibertá que, tanto la Ilesia como los políticos más conservadores, nieguen. La norma d’interrupción voluntaria del embarazu de 1985, qu'a la fin foi una lluz qu'acabó cola condena a viaxar al estranxeru de les muyeres españoles que queríen albortar, cuntó col votu en contra del Grupu Popular. Pa la llei de 2010, aprobada un añu enantes pol Gobiernu de José Luis Rodríguez Zapatero, el PP amás de votar en contra, presentó un recursu d'inconstitucionalidá énte'l Tribunal Constitucional, qu’entá sigue ensin resolver. En 2014, Alberto Ruiz Gallardón viose obligáu a dimitir tres la retirada del proyectu de reforma de la llei que llevaba'l PP nel so programa electoral. El refugu social y l'emburrie feminista llogró que finalmente nun se presentare la que diba ser la llei más restrictiva de la democracia
¿Va caltener el pulsu col PP y romper col Gobiernu de Castiella y Lleón si'l plan antialbuertu nun s'aplica? ¡Quién sabe! Yo nun voi a insultar, como lo fizo Ayuso contra’l presidente del gobiernu, pero Feijóo, seya o non un autoritariu cabezaleru d’ultres, cada día lo paez más.