El domingu pasáu represetáronse en Bimenes Polémiques de comedia y Una comedia exemplar. En primer llugar gustaríame centrame nunos personaxes mui peculiares que tienen un papel relevante nestes representaciones, anque nun seyan actores. En Llangreu, Samartin del Rei Aurelio y Llaviana llámenlos guirrios, mentanto en Siero y en Bimenes conócense por sidros. Pero notros llugares d’Asturies estes mascaraes d’iviernu tienen unos personaxes asemeyaos: los Zamarrones de Lena, los Zaparrastros de Aller, Os reises d’Ibias y Valledor, los Bardancos de Caso, amás de los Guilandeiros de Tineo y los Aguilandeiros de Cangas de Narcea, San Juan de Villapañada y de Allande. Nun son celebraciones esclusives d’Asturies, hailes en Galicia, Cantabria, Navarra, País Vasco y tamién en Llión y Zamora. En realidá estiéndense per toa Europa; sorprende les asemeyanzes con otros llugares del mundu como en Rumanía o Bulgaria. De toles formes, si ficiéramos una entrevista n’Asturies sobre’l conocimientu y respercusión que tienen estes celebraciones ancestrales y la conociencia d’estos peculiares personaxes toi segura de que comprobaríemos el desconocimientu de la mayoría d’asturianos.
La orografía de dalgunes fasteres d’Asturies pol so aislamientu benefició a estes celebraciones, asina caltienense mui vives tanto na fastera occidental, n’Ayande, como na fastera oriental, en Ponga. Precisamente ellí, en San Xuan de Beleñu, el Guirria sal a la cai n'Añu Nuevu pa pidir l'aguilandu, anque la so indumentaria, van vistíos metá home, meta demoniu, estémase de la de los guirrios o sidros de la fastera central que lleven una especie de cucuruchu d'unos sesenta centimetros recubiertu con un pelleyu d´oveya en forma d'embudu alredor de la mázcara (rematau con un rau de raposu) que tapa la cara y que baxa hasta la cintura. Esta especie de «Homes oveya» con mázcares encarnaes que faen sonar los cencerros peles caleyes mentanto acompañen a “La Comedia”, formen parte del sarcásticu teatru popular.
El casu ye que el so orixe vien de les celebraciones y ritos de tipu totémicos de pueblos primitivos que s’amazcaraben con pelleyos, una de les sos misiones yera espantar a los llobos que yeren el principal enemigu de los pastores. Tamién tán ligaos a ritos de pasu de los mozos, por esti motivu, perseguíen a les muyeres pa propiciar la fecundidá, dalgo esencial nes cultures ancestrales.
Ello ye qu’esti tesoru de tantu valir a puntu tuvo de la desaparición debío a les penuries de la postguerra, anque paezme que a censura tamién debió tener parte de culpa. Nos años cuarenta y cincuenta hebo intentos de recuperación en Sotrondio y en Siero que nun medraron polo que quedaron arrequexaos a los desfiles folclóricos. Gracies al llabor de persones como Pablo Canal, miembru de «El Cencerru» (l’Asociación Cultural pola Recuperación de los Sidros y les Comedies de Valdesoto) que trabayen en documentar, recuperar y caltener estes celebraciones, podemos disfrutar d’estes representaciones na fastera central.
Esti añu denuncióse como siempre varios temes llocales, pero ente toos destacaben dos, la necesidá de que Valdesoto fuese normáu d’una vegada pueblu exemplar y la reivindicación de llograr la oficialidá del asturianu al socialista Adrián Barbón, presidente d’Asturies, qu’otru añu vieno más quixo «sofitar la cultura asturiana» y reconocer l’esfuerzu de les persones que trabayen pa qu’enxamás se pierdan estes tradiciones. Mentanto los personaxes de la Comedia dicíen-y al altu la lleva que en Bimenes la oficialidáyá va tiempu que se tien, N’Asturies, non, y que si se quier, «faise y yá ta». Barbón retrucó-yos ente rises que pa llogralo necesitábase que la sofitaren 27 diputaos, ye dicir, tres quintes partes de la Xunta del Principáu. Tanto’l públicu como los actores respondieron-y unánimes: «¡Ya, ya, ya, oficialidá!».
Ello ye que va 123 años José Noval Siero robló tamién en Valdesoto un Saynete nel qu’actuaben once personas: el Socialismu, una obra teatral con un gran éxitu y qu’amosa la llegada de les idees socialistes al entamu del sieglu xx. Esta comedia de sidros lligada al movimientu obreru echóse en Llangreu, Barros y Tuilla. Sábese que nel añu 1901 llevóse a Lada pa comemorar l’aniversariu de la fundación de l’Agrupación Socialista d’esa llocalidá, onde tuvo tantu ésitu que s’echó 3 años más.
Un añu enantes, Miguel Lavín, col nomatu de Manuel Vixil Montoto, publicó na sección «Conversaciones» un artículu tituláu «Los sidros» nel que ve la posibilidá d’usar les comedies pa propagar les idees socialistes. Diz que, como otros años, “van salir en comparsa o en grupu, pero en vez d’amazcarase de payasu, de guerreru… dirán vistíos de mineros o burgueses, o como les convenga, y van falar de la explotación que sufren y predicando la unión p’acabar con ella”. Montonto ta convencíu de que ye una distracción noble propagar les idees socialistes pa que “llegue pronto el día nel que los probes nun sirvan a los ricos, acabándose la farsa social onde los obreros son siempre esplotados, que nesta gran comedia humana del mundu burgués son quien faen d’últimu monu. Viendo na actualidá los beneficios de dalgunos bancos y la precariedá de la mayoría de trabayadores, sobremanera los más mozos, vemos los pocos cambeos qu’hebo nesi sentiu. Oxalá nun tengamos qu’esperar otros 120 años pa llograr qu’estes representaciones queden como recordatoriu d’un tiempu pasáu ya superáu.