Igualdá y educación (II)

María Luz Pontón

OPINIÓN

María Pedreda

La fecundidá, Tamames y el remanamientu políticu de la reina Isabel la Católica

27 mar 2023 . Actualizado a las 11:19 h.

Nel sieglu XIX constituyéronse los sistemes educativos nacionales n’Europa. N’España la Constitución de 1812 estableció que la educación yera un asuntu d’Estáu. Na llei Moyano de 1857 la obligatoriedá de la enseñanza abarca ente los 6 y 9 años con un modelu educativu «diferente» pa los dos sexos; nel casu de les neñes l’oxetivu principal yera convertiles en bones esposes y madres dedicaes al cuidáu de la familia y la casa. Cola República y la Constitución del 31, el proyeutu educativu convirtióse na «piedra angular». Hebo cambios radicales: dende un plan masivu de creación de construcciones escolares la escuela pasó a ser pública, laica, gratuita y obligatoria. Consideróse la educación como’l meyor instrumentu p’acabar coles desigualdaes de xéneru, polo que se desanició la separación en favor de la coeducación, anque nun dio tiempu a completalo. Per primera vegada, les muyeres teníen accesu a la educación, tanto en secundaria como en bachiller y na Universidá y la so titulación universitaria llevaba a un exerciciu profesional. 

Toles metes llograes desapaecieron cola dictadura franquista. Les muyeres perdieron los derechos conquistaos, con un retrocesu nel so procesu d’emancipación. El nacionalcatolicismu relegó a la muyer como fía, esposa o madre, a vuelta col ámbitu domésticu y los cuidaos. Nesa nueva configuración de la identidá femenina, la educación tuvo un papel primordial. Lo primero foi la depuración del profesoráu: hebo dende amonestaciones hasta execuciones. La Sección Femenina formó a una parte importante de les futures mayestres. Pa exercer el maxisteriu la Sección Femenina obligaba a les mayestres a facer unos cursos pa qu’abrazaren un modelu de muyer pa Dios, pa la Patria y pa la casa. Les escueles fueron controlaes pola Ilesia católica qu’eliminó la coeducación. Como lo principal yera saber guisar, planchar, repasar, etc. la educación primaria femenina preparó especialmente «pa los llabores de casa, artesanía ya industria doméstica». D’esta miente demonizóse a les muyeres que lluchaben polos sos derechos o que s’oponíen a la reclusión nel espaciu domésticu. Cola Llei d'Ordenación de la Enseñanza Media de 1953, afítase la feminización de la enseñanza secundaria cola obligación de cursar les materies de «Enseñanzas del hogar» en tolos cursos hasta la Reforma de 1970. Pa llograr el títulu nes pruebes de reválida había una prueba específica sobre estes materies. Pese los cambeos tan importantes de la Llei Xeneral d’Educación de 1970, onde yá nun se segregaba per sexu, tuvieron que pasar 14 años pa que les neñes cursaren, con caráuter obligatoriu, el mesmu currículu que los neños. Entá en 1974, acordies col Ministeriu d’Educación, por causa de los prexuicios y estereotipos de la dictadura, namás había once muyeres caderalgues. 

En 1990, cola LOGSE, reconocióse la discriminación per sexos nel sistema educativu y la importancia de promover la educación igualitaria en tolos aspeutos y niveles de la educación española. Foi en 2015 cola LOMCE cuando se volvió p’atrás na igualdá yá qu’amparaba la separtación per sexos nos centros escolares y el sofitu de la educación relixosa (católica), que pasó a tener caráuter evaluable y de cómputu pal espediente y la nota media. Por suerte la nueva llei d’educación, LOMLOE, tien ente les sos principales metes la igualdá efeutiva ente muyeres y homes en toles etapes y la prevención de la violencia de xéneru. Por esti motivu, creóse una nueva materia pa fomentar valores civícos ya éticos como la igualdá, al empar qu’insta a fomentar la presencia d’alumnes n’estudios del ámbitu de les inxeneríes. Amás, el Conseyu Escolar tien que tener una composición equilibrada ente homes y muyeres. Per otru llau, los centros tán obligaos a incluyir proyectos que faigan realidá la igualdá.

¿Algamamos na actualidá la igualdá ente homes y muyeres? Un estudiu de la Universidá Pablo de Olavide y la Universidá de Sevilla alerta de que l’accesu a formación continua y los tipos d’estudios qu’escueyen muyeres y homes n’España, anque altu, esperimentó un progresu menor que la igualdá llaboral y la política. Eso ayuda a desplicar el motivu de que seya tan baxu’l númberu de muyeres como especialistes en TIC y que namás «un 1,7% de les neñes vese desempeñando nun futuru una profesión nesti sector». Mentanto les estudiantes con promedios mui altos en matemátiques nun escueyen inxenería, ellos, con promedios más baxos, sí. Según el primer estudiu sectorial fechu pol Observatoriu de la Inxeniería d’España (OIE), namás un 20% de les persones qu’estudien inxenería son muyeres; ye dicir, los emplegos del futuru, por mor de los sesgos y la presión social, cultural y familiar, siguen güei entá en manes de los homes. L’indiz d’igualdá ClosinGap diz que va llevar 22 años algamar la igualdá de xéneru a esti ritmu.

¿Qué pasaría si la ultraderecha gobernare xunto al Partíu Popular a partir de les próximes eleciones? L’exemplu d’estes postures negacionistes vémosles na comunidá de Castiella y Lleón na que Vox y el PP tán acabando coles midíes pola igualdá de muyeres y homes. Arriendes de que’l so gobiernu ye’l menos paritariu de tol estáu, con namás tres muyeres, tramitaron una llei autonómica de violencia intrafamiliar que niega'l conceptu de violencia de xéneru, suprimieron la llinia específica pa la contratación de víctimes de violencia de xéneru y acabaron coles ayudes a la muyer rural. La llarga propuesta de Vox plantegaba’l desaniciu de cualquier midida rellativa a la prevención de la violencia de xéneru nes aules y tolo que tenga que ver coles lleis en materia d’igualdá. D’otramiente pidió tamién acabar con cualesquier conteníu «afectivo-sexual» nos diseños curriculares en cualesquier etapa educativa de los centros escolares de la comunidá. Ye normal que los grupos d’oposición calificaren estes iniciatives que pretenden modificar les lleis educatives de «reaccionaries y medievales» y d’un «despropósitu imposible» que va a la «escontra» de la Constitución al defender una ideoloxía «reaccionaria» que niega la violencia machista.

Na moción de censura de Vox, Ramón Tamames, qu’emplegó los prexuicios reaccionarios escontra les muyeres na llinia de la estrema derecha, namás fizo referencia al xéneru femenín cuando faló de la baxa natalidá d’España. L’economista punxo de modelu a la reina Isabel la Católica porque «tenía más poder que’l rei». El periodista ya historiador Giles Tremlett, qu’escribió una de les sos últimes biografíes, denuncia que «el franquismu aprovechóse y abusó de la so figura pa convertila en símbolo del tipu de réxime nacional-católicu qu’ellos mesmos queríen imponer». Sorprende que Tamames nun mencionare dalgunos precedentes de reines que gobernaren enantes de la llegada de Isabel la Católica, como doña Urraca nel sieglu XII, que-y enllanó’l camín, nin desplicare’l motivu de por qué namás permitíen acceder al tronu a una muyer cuando yera la única opción qu’había. Ensin dulda, un profesor de l’altura de Tamames conoz que la Europa medieval favoreció la opresión que'l sexu masculín exerció sobre'l femenín, una subordinación que s'agravó cola incorporación de les tesis aristotéliques por Tomás de Aquino nel sieglu XIII. Esta rellación de poder implicó toa una serie de violencies producíes pola so situación d'inferioridá. Tuvieron que pasar munchos sieglos pa camudar esta situación inxusta. 

Ye necesario cortar l’avance peligrosu y continuu de la estrema derecha que quier llevar otra vuelta a les muyeres al ostracismu. Poques causes son tan xustes, necesaries ya urxentes como'l feminismu. L’índiz d’igualdá de xéneru de 2022 alvierte de «que la puntuación dio un xiru con reducciones en dellos ámbitos per primer vegada dende 2010»; cuntando con que los avances yeren mui fráxiles, como diz l’informe anterior, van necesitase tres xeneraciones p’algamar la igualdá de xéneru. Na actualidá yá hai una parte de la mocedá que compra’l discursu populista, tresgresor y antifeminista d’ultraderecha y que, d’acordies al Barómetu sobre Mocedá y Xéneru del Centru Reina Sofía de 2021, unu de cada cinco mozos y moces ente 14 y 29 años camienten que la violencia machista nun esiste. Si llegare al gobiernu d’España impondríase la tesis de lo que’l sociólogu Michael Kimmel llama «hombre blancu enfadáu» pol ataque de contino del feminismu, lo que les estremistes llamen el «sexismu modernu y discriminatoriu» que busca la superioridá sobre los homes, pese que «les muyeres tienen énte la llei más derechos». El PP yá anunciare que namás que gobierne acabaríen cola LOMLOE, una llei qu’apuesta porque tolos estudiantes reciban la meyor formación pa convertise en persones llibres y autónomes que tengan argumentos pa lluchar pola igualdá na vida llaboral, compartir y corresponsabilizase na vida familiar y algamar una ciudadanía responsable. Nun quiero nin imaxinar cómo podríen ser les lleis que tramitaren xuntos, tanto educatives como non. Nun fai falta mirar pa otros países pa saber qué pasa cuando la ultraderecha entra nel poder, vimos nidio nel pasu de la República a la dictadura cómo se frustraron toles metes. Lo malo ye qu’hai una llarga y granible trayectoria de la ideoloxía de la ultrarreaccionaria ultraderecha n’España, polo que ye urxente facer tolo posible pa que se perciba como l’amenaza que daveres ye, y non como una opción aceptable.