Va un añu enfrentéme al Día de les Lletres Asturianes con sentimientos bien contradictorios. Per un llau, cola allegría y l'arguyu del mio nomamientu como miembru de númberu de l'Academia de la Llingua Asturiana que se producía esi día. Per otru, cola murnia sensación, tan recién entós, del que yá paecía un fracasu definitivu de la reforma estatutaria con oficialidá nesta llexislatura. Un procesu nel que tanto trabayemos munches persones enfotaes na verdadera posibilidá de sumar los 27 diputaos necesarios.
Aproveché aquel discursu pa facer un últimu llamáu desesperáu pa un alcuerdu, y anque hebo dalgún movimientu, nun dexaba de ser una pose que buscaba facer más dixeribles determinaes postures inesplicables y contradictories colo que se nos dicía en privao.
Tres una llexislatura perdida pa la oficialidá, recibo esti Día de les Lletres Asturianes con sentimientos tamién encontraos. Per un llau, entá cola decepción de la falta de valentía que nos llevó a nun reformar l'Estatutu d'Autonomía, pero per otru, cola esperanza puesta nes elecciones del viniente 28 de mayu y na posibilidá de sumar mayoríes suficientes pa la oficialidá.
A poco más de venti díes de los comicios autonómicos, esti Día de les Lletres Asturianes ye un bon momentu pa reflexonar sobre los errores del procesu de reforma, sobre cómo algamar un mayor consensu social y políticu, mui especialmente nel espaciu políticu del centrodrecha, que mui cerca d'equí, en Galicia, asume con naturalidá la defensa y promoción de la so llingua propia, pero equí sigue ensin sumar a esa mayoría necesaria.
Esti ye tamién un día de vuelta a la normalidá col actu de l'Academia de la Llingua Asturiana nel Teatru Campoamor, de nuevo abiertu a la sociedá. Recibir a un home con tantu talentu como David Guardado como académicu de l'ALLA, y poder esfrutar de la poesía de la nueva Premiu Nacional de Lliteratura Asturiana, Lourdes Álvarez, son tamién noticies que dan pa sentir allegría y optimismu.
Con esi optimismu atropaú, pero tamién con cabeza y el llabor de tola sociedá, toi seguru que d'equí a un añu taremos trabayando nun procesu de reforma estatutaria que permita al asturianu y al eonaviegu siguir tresmitiéndose y usándose nel futuru, con tolos drechos, porque d'esto va la cuestión, de la supervivencia d'un patrimoniu de la humanidá que ta nes nueses manes y de la garantía de los drechos pa quien quiera mandase d'estos idiomes. Bon Día de les Lletres Asturianes. Bon Día das Lletras Asturianas.