La Constitución española establez que’l fin de la organización territorial del Estáu ye l’autogobiernu de conceyos y comunidaes autónomes. Nel artículu 156, párrafu 1, diz que les comunidaes autónomes han gociar d’autonomía financiera guardando una coordinación cola Facienda estatal y respetando’l principiu de solidaridá. Pa ello, sigue’l párrafu siguiente, les comunidaes autónomes van poder actuar como delegaes o collaboradores del Estáu pa la recaldación, la xestión y la lliquidación de recursos tributarios. Nel segundu párrafu del artículo 150, amás, afítase que l’Estáu pue tresferir a les comunidaes autónomes facultaes que correspuendan a materia de titularidá estatal.
Según la más alta llei del Estáu español, entós, lo que ta pasando en Catalunya col alcuerdu pa ceder la recaldación fiscal a esa comunidá autónoma ta dientro de los parámetros normales y previstos. ¿Por qué hai, entós, tantu rucar de dientes en dellos sectores? Dicen dalgunos que va romper el principiu de solidaridá y igualdá ente los españoles. Eso nun ye verdá porque con cualquier cesión de competencies que faiga l’Estáu a una comunidá autónoma, aquél acútase siempres les midíes de control pa caltener esos principios de solidaridá y igualdá. Les fuerces polítiques qu’esgrimen esi argumentu son, gran casualidá, les recentralizadores, les que se dicen constitucionalistes pero quieren acabar cola totalidá del Títulu VIII de la Constitución (del artículu 137 al 158). A estos «constitucionalistes», resumiendo, nun-yos presta’l principiu constitucional del autogobiernu de les comunidaes autónomes.
Llevándolo al territorio que de verdá nos interesa n’Aína, persabemos que l’autonomía real pasa por asumir les competencies fiscales y depués contribuyir a la solidaridá interterritorial considerando factores como l’avieyamientu la población, la dificultá orográfica y de comunicación o parámetros comparativos oxetivos d’atención a les necesidaes de les persones. Si l’Estáu recalda, les partíes vuelven p’Asturies yá distribuyíes y, asina, l’Estáu ye quien decide qué y pa qué. Si Asturies recaldare y depués separtare les perres pal fondu de solidaridá interterritorial, el gobiernu asturianu sedría autónomu pa decidir qué y cómo invertir en caúna de les cuestiones qu’afecten a los y les asturianes.
El drama d’Asturies ye que nun hai fuerza nenguna na Xunta Xeneral que lo reclame. Col «problema catalán», asítiense nun polu o n’otru dependiendo de los sos intereses na política estatal, pero nengún quier tener capacidá política real; confórmense toos con ser xestores de lo que decidan por ellos en Madrid.
Lo malo de ser xestores namás ye que cuando nos pica’l niki nun tenemos manes p’arrascanos. Si n’Asturies nun recaldamos y nun tenemos capacidá y autonomía política real, les compañies asturianes quieren tar cerca d’onde se tomen les decisiones (Madrid). Por eso tamos como tamos, comparativamente, en Madrid y n’Asturies. ¿O ye que dalguién pensaba que les madrilanes salíen de fábrica más salaes y les asturianes más burres? Non, ye que’l poder políticu, la capacidá real de decidir, ta ellí y el poder económicu va siguiéndolu.
Por eso Madrid xorrez y nosotres menguamos, económicamente y en población. Depués los xestores que se dicen llamar políticos lleven años falucando de cuándo baxaremos del millón d’habitantes. Y hasta ponen en marcha una comisión que piensa que con regalar 100 o 1000 euros al añu por neñu van salir les families de debaxo les piedres. Pero ye que nun valen parches. Pa que medren les families n’Asturies tienen que dase unes condiciones de vida dignes en cuantes a trabayu, educación, sanidá, ociu. Y claro, pa pasar de les comisiones a les realidaes hai que ser políticos, non xestores.
Eso ye lo que de verdá esmolez a Aína al pensar el futuru del nuestru país asturianu. Eso ye lo que vien a camudar: que los y les asturianes tengamos voz y capacidá pa tomar decisiones sobre les nuestres vides.