El SESPA, Serviciu de Salú del Principáu d’Asturies, ye’l muérganu encargáu de los hospitales n’Asturies. En xeneral tolos hospitales ufren la información al públicu en castellanu. Hai esceiciones a nivel oral en que retruquen nel idioma de la entruga, como por exemplu, nel de Mieres del Camín, por exemplu. Pero la cartelería, la información escrita de les sales, los servicios, ya eso, ta siempres en castellán.
La salú ye una cuestión perimportante en cualesquier sociedá europea, polo que tien d’atendese a los ciudadanos nel so idioma, non solo a nivel oral, sinón nel más formal nivel escritu.
Los hospitales son los llugares más importantes onde s’opera y curia la xente. Poro, ye incomprensible que la única llingua escrita d’estes instituciones dependientes del Gobiernu d’Asturies seya’l castellanu.
Bien de pacientes usen l’asturianu, como pa que nos hospitales tean preparaos pa informalos nesi idioma.
Non solo pa nomar les especialidaes médiques, sinón los planos de los edificios, la información rellativa a los llugares destinaos a les sales d’espera, a l’alimentación y sobremanera a los servicios d’información al paciente.
Los médicos nun tienen la obligación de saber asturianu, pero los hospitales han ser accesibles nesti idioma amás del castellanu. Asina como yá s’ufierta na páxina web del SESPA.
Tener hospitales billingües ye como les conseyeríes billingües, onde toles informaciones supónse que tán n’asturianu y llueu supónse tamién qu’hai daquién del personal que ye quien a caltener una conversación n’asturianu si se demanda, según la Llei d’usu y promoción del asturianu de 1998.
Poro, nun fai falta esperar a la oficialidá pa que los hospitales del SESPA puean rellacionase colos pacientes n’asturianu. Asina como tamién val pa los Centros de Salú espardíos pela xeografía astur.
Un principiu básicu pa la salú de la totalidá de la población asturiana, non solo pa los que falen na única llingua oficial, pel momentu.
La Cultura, la Educación y la Sanidá son pegollos cimeros d’una sociedá plural, avanzada y democrática como tien de ser l’asturiana.
D’esta miente, sedría una bona aición la igua de los hospitales nel sen de presentase énte los pacientes col billingüismu que la sociedá demanda en toles encuestes pa esti pequeñu país.