Comisiones Obreres d’Asturies tará otra vuelta esti sábadu, 10 de mayu, na manifestación a favor de la oficialidá del asturianu convocada pola Xunta pola Defensa de la Llingua Asturiana. Ehí tuvo siempre.
El sindicatu tien un compromisu cola llingua asturiana, conseñáu nos estatutos y afitáu na práutica col so usu nes publicaciones. Tamién ye firme la nuestra defensa de la so oficialidá.
Por eso garramos la iniciativa de promover y presentar, el pasáu 13 de marzu n’Uviéu, el primer manifiestu Sindicatos pola oficialidá, un respaldu inequívocu a la nuestra llingua per parte de doce organizaciones que representamos a la clas trabayadora asturiana y un llamamientu a les fuerces polítiques col envís de que «nun dexen pasar esta oportunidá pa que, al marxe de les llexítimes diferencies ideolóxiques, se proceda a una reforma estatutaria que garantice l’usu oficial del asturianu y del eonaviegu, la llibertá del emplegu llingüísticu y la non discriminación de los falantes y que seya, al empar, una fonte de desarrollu social, cultural y económicu pa tola ciudadanía asturiana».
Dellos díes depués, la Xunta Xeneral del Principáu sofitaba de forma mayoritaria y per primer vegada la oficialidá del asturianu y l’eonaviegu, anque siguimos lloñe de la mayoría cualificada que rique la reforma del Estatutu. Nos caberos años CCOO d’Asturies vien defendiendo una reforma del Estatutu d’Autonomía qu’enanche la nuestra capacidá d’autogobiernu y asuma la oficialidá. Y nun vamos rindinos, porque Asturies nun quier ser más pero tampoco pue ser menos que cualquier otra comunidá autónoma. Poro nun ye a entendese que se nos niegue lo qu’a otres se-yos da.
Na so intervención na Xunta Xeneral del Principáu, el pasáu 3 d’abril, nel alderique sobre la declaración oficial del asturianu, el director del Institutu Cervantes, Luis García Montero, defendió la so oficialidá dientro de la diversidá del nuestru país, y señaló qu’ensin ella la nuestra llingua tará siempre en desventaya, porque la falta d’esa reconocencia «debilita de mou claru non solo a la llingua, qu’alcuentra’l mou de vivir nos sos falantes y nos sos escritores, sinon sobremanera a la calidá del so espardimientu y de la so perceición per parte del posible públicu que podría averase a ella».
L’asturianu forma parte, de xuru, del nuestru patrimoniu cultural y amerita la máxima reconocencia. La oficialidá nun supón ?bien al contrario de lo que traten d’esparder con mala fe los sos detractores? una perda de derechos ni impondrá obligaciones. Ye la fórmula qu’afita la Constitución y la única manera de curiar la nuestra llingua y protexer esti patrimoniu cultural.
Namái quien tea a la escontra d’Asturies pue tar a la escontra de la llingua. Poro, como dixo García Montero, «nun dexa de ser raro que dalguién puea despreciar la so propia riqueza».
Asina lo entendió tamién el secretariu xeneral del nuestru sindicatu, Unai Sordo, na visita que fixo al llar de l’Academia de la Llingua Asturiana, porque «esti país nun ye uniforme nin monollingüe».
Ye hora d’acabar con esta inxusticia histórica, con esta desigua. Y asina lo vamos reclamar esti sábadu n’Uviéu. Oficialidá, yá. Asturies y la so llingua merécenlo.