El llibru «Asturies, Gens Hispaniae», de J. Ramón García, sobre´l cristianismu tempranu nel Reinu d´Asturies
OPINIÓN
Un llibru que me prestó lleer fai poco foi’l de José Ramón García Fernández (Villaviciosa 1936), más conocíu como «Monchu’l Cura». Esti llibru ye una llambionada pal que tea metíu nos temes del primer cristianismu seya onde seya, que nesti casu ye la mesma Asturies u vivimos y trabayamos o dexamos de trabayar. Como protestante asturianu creo que Monchu’l Cura fai un bon trabayu que munchos evanxélicos podemos compartir como base d'un diálogu productivu referíu a la nuestra historia y espiritualidá.
Yo creo que la tesis fundamental del llibru ye que nel Reinu d'Asturies diose una variedá de cristianismu que nun siguía la tendencia xerarquizada, centralizada y dependiente del Obispu de Roma, más tarde Papa y tovía más tarde Papa Infalible. N'Asturies arraigonare un cristianismu mui acordies col sustratu celta de ciertu animismu, d'adaptación al llar propiu, d’arquitectura y lliturxa desendolcaes nel mesmu contestu cultural. Monchu ye mui bonu envizcándonos, con cierta señardá, esa forma de cristianismu yá perdíu ?o más bien afogáu? pol poder cada vez más centralizador de la Ilesia que, al traviés de la reforma de Cluny, fixo posible una mayor y eficaz imposición de les directrices romanes.
No fondero, la cuestión del llibru de Monchu, tituláu «Asturies, Gens Hispaniae: Iglesia local y nación histórica», ye saber reasitianos na historia d'aquellos sieglos una vegada llimpia de capes y capes d’ideoloxía nacionalista española, que tenía como misión proyectar d'un mou daqué emperruñáu la moderna idea d'una España centralizada gracies a un proyeutu cuasi místico-hegelianu o divín sofitáu pola Ilesia de Roma y el mitu de Cuadonga. Si llogramos soltar eses gafes ideolóxiques tan alloriantes güei hasta nos partíos más «progresistes», veremos que les coses yeren bien diferentes.
El Reinu d'Asturies non obedez a un proyeutu ideal d'una España arquetípica que yá percibíen los visigodos de Toledo y que Pelayu retomó cola batalla llexendaria de Cuadonga. El Reinu d'Asturies yera una entidá político-territorial en forma de monarquía cristiana que surde al alba del Reinu Carolinxu y la Marca Hispánica, pero de calter nativu astrur-cántabru, con fuerte tradición de resistencia al Imperiu Romanu primero, y que va afitándose como entidá política, histórica y relixosa propia.
Tal cristianismu tien unes peculiaridaes y obediencies que lu caltienen nuna autonomía fuera de les tendencies más doctrinaries y autoritaries d’otros territorios o naciones baxo la férula del incipiente catolicismu papal. El llibru presta muncho lleelu polos detalles, cites y episodios que refresquen lo que foi aquella realidá en sí mesma, fuera de los paradigmas ideolóxicos actuales.
La segunda parte del llibru sigue siendo esi intentu de facer ver que la unidá d'España nun pue interpretase según el nacionalismu centralista, pues España ye un conxuntu de naciones y llingües diferentes qu’en cuentes de forzales a abandonar la so identidá propia desaniciando les sos llingües y instituciones, lo más civilizao dientro un proyeutu d'Estáu sería l’harmonización y equilibriu colos mesmos derechos y llibertaes. Monchu ataca con della indignación esa tendencia nacional-católica de sofitar con puxu al Estáu centralizador y represivu de minoríes nacionales, esos papes reaccionarios o ultrarreaccionarios que parió la historia de la Ilesia, por desgracia; esi Xeneralísimu Franco baxo paliu de Roma mientres se llevaba a cabu la represión más xabaz escontra les llibertaes democrátiques más elementales.
Nel llibru demuéstrase perbién el conceutu de nación a lo llargo de la historia, el nacionalismu d'Estáu orixináu cola Revolución Francesa, enemiga acérrime de les diferencies ente les naciones étniques y máquina represiva escontra de les sos llingües y el so pasáu históricu, que va ser enforma escaecíu.
Conozo personalmente a Monchu y doi fe de que se trata d'una persona honesta, d'un espíritu democráticu afable y mui abiertu. Gracies, Monchu, por esta importante aportación d'investigación y pensamientu llibre. García Fernández, José Ramón (2023): «Asturies, Gens Hispaniae: Iglesia y nación histórica», Uviéu: Ediciones Trabe. [342 páxines].