¿Quién ye mas censurable: una persona que corrixe, chambona pero correctamente, un cartel indicador de población ilegal o l’alministración qu’anecia en caltenelu, despreciando’l nome oficial del llugar? ¿Qué mediu de comunicación ye más respetuosu cola población a la qu’informa: el que, d’acuerdu cola llei, restituyó los topónimos tradicionales nes sos cróniques, noticies y reportaxes o’l que los desdexa, anque fueren aprobaos pol gobiernu d’Asturies, y sigue refiriéndose a los sos pueblos y villes col nome tracamundiáu o castellanizáu, y yá derogáu, que l’alministración española d’antañu impunxere?
¿Qué diputáu o alcalde ye más democráticu, el o la qu’usa nes sos comparecencies la toponimia llegalmente rehabilitada o’l que s’emperra siempre en llamar a los llugares del so conceyu col nome alteriáu castellanamente y yá descartáu polos representantes del pueblu? Pa responder oxetivamente a les preguntes anteriores, pueque sía afayadizo recordar que la toponimia oficial d’Asturies ye’l resultáu d’un llargu procesu d’estudiu y recuperación de los nomes de llugar tradicionales, que cuntó cola revisión y consensu de les entidaes locales y los conceyos enantes de que’l Conseyu de Gobiernu aprobare los decretos que los facíen oficiales.
Pero pasen los años y la galbana, la inorancia y los prexuicios de ciertes élites polítques y mediátiques impiden que’l proyectu s’afite dafechu na sociedá: son, en gran midida, les mesmes élites que censuren a otros por nun respetar la Constitución o cumplir les lleis nes cuestiones qu’a elles sí-yos interesen. Nada nuevo n’Asturies, de toes maneres, esa ranciura mugorienta y reaccionaria, qu’espatuxa repunante cada vez que s’entamen iniciatives a favor de la cultura o la llingua del país.