Acuérdome del añu 78 nel colexu, de como pegaben los profes, de tener que rezar, de profesores que dormín la siesta en clase. De un sistema educativu que necesitaba una igua per grande. Un sistema educativu donde falar asturianu yera falar mal. Fue nel año 1981, un profesor de llingua española que yera más muzu que los otros, intervino cuando la xente se rió de un collaciu que dixo «miagar». Dixo que l’asturianu yera una llingüa y había que respetalo. Alcuerdome como si lo tuviera delante, porque pa mí, fue como la caída del caballu de San Pablo.
Nel añu 78, al mio rodiu había muyeres que aguantaben la violencia día tres día. Y falaben dello los adultos como con vergoña, solo con los años alcancé a entender lo que pasaba. Y naide facía ná. Nel añu 78 mio pa trabayaba de 50 a 60 hores semanales. Mio ma entamó a trabayar más o menos por esi añu, sin seguridá social. Trabayaba vendiendo huevos sin cascu de pites que taben males, y huevos rotos y una cosa que- y llamaben caldu. El caldu yeren los huevos que nun valín pa vender ni rotos, ni sin cascu. Vendín calderos de aquella asquerosidad pa una industria de bollería industrial.
A mediaos de los 80 prohibiose primero la venta del caldu, después prohibiose vender sin cascu, después rotos y después ya los sucios. Cuando digo sucios, yeren sucios de sangre y gallinaza, nun penséis que tenín un pucu de polvu per rriba. Tamién a mediaos de los 80 asegurarenla.
Per aquella dómina, mio guela pagaba la iguala pa que Don Héctor fuera a vete a casa si tabes malu. Mio guela pagó la agraria, por tantu ella tenía seguridá social, pero asina y tó tenía que paga-y la iguala al médicu. Acuérdome del médicu fumando puros sin parar y de una pizarra nel bar, donde te apuntabes pa cuando venía el médicu tener la vez pedía. La protección de datos ya tal.
Yo vivo per bien. De los 8.000 millores de persones que hay nel mundu, vivo meyor que 7.000 millones. Mirando renta, seguridá, esperanza de vida. Y soy obreru, de cuellu blancu, pero obreru a la fin. Fiyu. Soy clas obrera y la mio familia y amigos son clas obrera, vivo nun piso protección oficial nun barriu obreru, precisamente fechu en 1978. Nun vivo nun chalet en Galapagar. Los mios guajes van al colexu públicu más cercanu, como fui yo al que tenía al pie de casa. Y con tó y con eso soy un completu privilexiau nesti mundo. Nun solo nesti tiempo sinon comparándome con cualquier tiempo pasau.
Por eso nun tengo vergoña en declarame de izquierdes y conservador, quiero conservar el mio mou de vida. Nun solo ye lexitimo, sinon que ye el mio deber moral pa colos mios fíyos. Porque la educación pública comparao con la mio epoca ye perbona. Porque la sanidá funciona per bien, aunque necesite más medios. Porque ta falándose de la xubilación anticipá pa les profesiones de riesgo y falándose de los dereches de les trabayaores de la asistencia a domicilio y falándose de reducir la xornada en sitios como los supermercaos. Y ta sancionándose a los empresarios escalvistes de la agricultura del sur. Y el gobiernu de España ye de los pocos que diz tímidamente la verdá sobre Palestina. Claro que queden coses como la vivienda que necesiten que se camuden les polítiques radicalmente, pero el sistema permitelo si hay voluntá.
Habrá xente que dirá que eso ye poco, que ye ser un conformista. Val, vamos ponemos revolucionarios. Quiero la abolición de la monarquía, la disolución de les diputaciones provinciales, la abolición de la educación concertao, un cambiu radical de modelu policial que suponga policies autonómiques en toles autonomies eliminando les policíes municipales y aumentu de les competencies de la policía nacional en detrimentu de la guardia civil. El fin del concordatu con la ilesia católica. Quiero un cambiu radical del senau y cambiar la circunscripción provincial por autonómica y cambiu de la forma de escoyer el congreso con 400 escaños, non 350, 50 de circunscripción estatal y los otros escoyios en demarcaciones pequeñes con dos vueltes virtuales a través del votu únicu transferible.
Quiero la supresión de los rexistros de la propiedá y la asunción de les sos funciones pol catastru. Y la reforma completa de les notaríes, que na más cobren y nun facen ná que valga. Y la supresión de les relaciones col estuau asesin de Israel y la independencia del Sahara. Y la oficialidá del asturianu, faltaría más. Y la derogación de la lley trans y la del sí y solo sí, volviendo al estatus xurídicu previu a eses dos chapuces.
Pero ¿sabes qué?, que la política de izquierdes tien que ser materialista, y el materialismu implica mirar qué ye posible y que non y conocer que sofitos tengo, cuantos somos. Por eso, les revoluciones y los cambios de reximen tan bien si tú vas salir en barcu o en avión si les coses se ponen males. Pero yo que nun aspiro a ser líder de ná sé que les revoluciones paguense con la sangre mía y la de los miós. Y sé que el dañu que van facer los fascistes si ganen cae sobre les mios espaldes y les de los miós. Por eso quiero un gobiernu que trabaye pol progresu nesti reximen del 78. Sé que dos dís de ca tres voy anoxame porque nun me gusta lo que facen o lo que dicen, pero eso pasa con cualquiera que gobierne.
¿Quier eso dicir que trago con lo de Cerdán?: Pues mira ye fácil. Si el mio guaje se casa y facemos boda y ta invitau un amigua míu que llamase Pedro. Pero Pedro vien depués de tar abatanando nel cobil de los gochos y vien puercu y arrecendiendo a gochu y acercase a dame la mano. Cuanod lo vea voy deci-y «ah Pedro, ¿cómo vienes de eses traces a la boda del mio fíu? Tas faltándome al respetu» Y dizme él, «perdona Pepín, ye que nun me di cuenta».«Mira chaval, marcha corriendo, dúchate bien y mudate con ropa limpia y después deso ya veremos si vuelvo falar». Y los gochos que tan bien cebaos, hay que coralos y escarnizalos pa comelos, que tolo que metieren pal buche tien que salir agora pal provechu públicu.