Whale-SETI comunicó na fin d’añu un alcuentru con xibartes potencial pa la comunicación con intelixencia non humana. Na rempuesta a una llamada de contautu d’un xibarte al traviés d’un altuparllante somarín, un xibarte averóse al barcu retrucando con una señal de saludu. Per 20 minutos retrucó a cada llamada de reproducción y comparóse les variaciones ente cada señal. Supón el primer intercambiu comunicativu ente humanos y ballenes nel so llinguaxe.
L’Institutu SETI, la Universidá de California Davis y la Fundación Ballena d’Alaska, collaboraron nel estudiu colos xibartes, ballenes mui intelixentes, con sistemes sociales complexos, faen ferramientes como les redes de burbuyes pa pescar y se comuniquen con cantos y llamaes sociales.
SETI afita que’l contautu con intelixencia estraterrestre pue sofitase col comportamiento sonoru de los xibartes. SETI ye una organización multidisciplinar ensin fin de llucru que quier guetar intelixencia nel universu. Ye socia, ente otros de la NASA.
Amás los xibartes fabriquen y remanen ferramientes, según un estudiu asoleyáu na Royal Society Open Science. Los investigadores alcontraron que los xibartes faen redes de burbuyes pa cazar y les usen de diverses formes n’Alaska. D’esta miente atrapen krill, pequeños crustáceos. Los xibartes soplen burbuyes que formen aniellos internos, controlando’l so númberu, el tamañu y la fondura de la rede y l’espaciamientu ente les burbuyes. Asina capturen unes siete vegaes más preses nuna sola inmersión. Y hailos que faen les redes de mou cooperativu.
Los cetáceos tán amenazaos pola degradación del hábitat, el cambéu climáticu, la pesca y la contaminación química y acústica. L’estudiu del so comportamientu aidará nel so caltenimientu y otres posibilidaes de comunicación interespecífiques. Inclusive col espaciu esterior.