Si pienso na invasión illegal d’Ucraína, provocada polos Estaos Xuníos, vienme a la mente un partíu de fútbol del Sporting de Xixón contra’l Madrid nel estadiu d’El Molinón. Yera la temporada 86/87. Tamos nel minutu 40 del primer tiempu. Va ganando’l Sporting 2-1. El porteru sportinguista Ablanedo garra’l balón coles manes nel área del Xixón. El delanteru madridista Hugo Sánchez avérase a Ablanedo y cálca-y un pisotón aprovechando que l’árbitru nun ta mirando. Ablanedo respuende al pisotón con una patada. L’árbitru velo, espulsa a Ablanedo y pita penalti a favor del Madrid. Col VAR, tol mundu podía ver la falta previa al porteru xixonés. Amariella pa los dos y a siguir, ensin penalti. Sí, la patada yera illegal, pero venía precedida pola falta del delanteru. Sí, la invasión rusa ye illegal, pero vien precedida de les pataes de los Estaos Xuníos. Esta ye la crónica d’esi otru partíu:
Cuando, a finales de la década de 1980, Mikhail Gorbachev punxo a andar les sos polítiques de glastnost (tresparencia) y perestroika (reforma) na Xunión Soviética, amás de reformar l’estáu quixo inaugurar una era nueva d’entendimientu pacíficu con Occidente. Llegó a un acuerdu col presidente republicanu George Bush padre pa facilitar la xuntura de les dos Alemañes cola única condición de nun mover la OTAN nin un centímetru al este. En 1991 desapaecía la Xunión Soviética y amanecía una Federación Rusa capitalista. McDonald’s inauguraba una sucursal na Plaza Colorada de Moscú. L’ambición de tolos presidentes rusos, dende Yeltsin a Putin pasando por Medvedev, foi la integración n’Occidente. Toos ellos propunxeron armar una arquitectura nueva de seguridá n’Europa. Hasta pidieron integrase na Xunión Europea y na OTAN.
Diba ser un mundu mui diferente. Una Europa con Alemaña como motor industrial y los descomanaos recursos enerxéticos y minerales rusos. Europa podía igualase económicamente colos Estaos Xuníos. L’imperiu de Washington nun lo podía permitir. Bloquió la integración rusa, amplió la OTAN hacia l’este, entamó güelpes d’estáu en vecinos de Rusia como Georgia, provocando guerres civiles y conflictos colos rusos. El campu últimu de batalla, Ucraína, una llende de miles de quilómetros con Rusia, el sitiu pel qu’entraron a Rusia les invasiones napoleónica y de la primer y segunda guerra mundial.
Volviendo al pasáu más inmediatu, Victoria Nuland, responsable d’asuntos europeos y euroasiáticos de los Estaos Xuníos, entama en 2014 un güelpe d’estáu n’Ucraína pa echar al presidente democráticamente escoyíu Viktor Yanukovich y poner un gobiernu escoyíu por ella. La consecuencia foi la llegada al poder d’elementos neonazis, la persecución de les minoríes (ente elles, la ruso parlante), la prohibición de falar rusu, la guerra civil contra la minoría ruso parlante nel este. Nesa guerra civil, l’exércitu ucraín abanderáu pol neonazi Batallón Azov asesinó a 14.000 civiles ucraínes.
¿Cuála yera la xugada? Llegar hasta les llendes ruses, militarizar Ucraína, provocar un cambeu de réxime en Moscú y dividir Rusia n’estaos pequeños y controlables p’arrampuñar los sos recursos de petroleu, gas y minerales. Confesólo públicamente Kaja Kallas, l’alta representante de la Xunión Europea pa los Asuntos Esteriores y vicepresidenta de la Comisión Europea.
¿Y la respuesta rusa? Intentar defender a la minoría ruso parlante y organizar un referéndum en Crimea p’anexonar esa península cola idea de retener la base que tien en Sebastopol y el so accesu únicu al Mar Negru y el Mediterraneu. Avanzáu’l conflictu, Rusia participa nos acuerdos de paz de Minsk I y Minsk II. Como reconoció na so biografía y n’entrevistes públiques Angela Merkel, entós canciller alemana, Europa y los Estaos Xuníos firmaron esos acuerdos pa engañar a Rusia, ganar tiempu y armar a Ucraína. La respuesta rusa a toes eses pataes foi la invasión illegal a Ucraína en febreru de 2022.
Rusia llamólo una «operación especial». Dixo que yera pa desnazificar Ucraína y protexer a la minoría ruso parlante del Donbass. Pero entró tamién pel norte y arrodió la capital Kyiv. Al poco, sicasí, l’exércitu rusu retírase de la capital ucraína. N’Occidente vendiéronnoslo como una señal de la incapacidá rusa. La realidá ye que ruses y ucraínes taben negociando n’Estambul. La desgracia pa toes nosotres ye que los Estaos Xuníos quería la so guerra; mandó al primer ministru británicu Boris Johnson a Kyiv pa dici-y a Zelensky que nun firmare, que los amos del mundu diben armalu y protexelu hasta la derrota final de la Rusia de Putin.
La guerra sigue. Si Kyiv cai, Washington y Bruseles quieren metenos a toles europees na guerra, quieren llevar a les nuestres fíes al mataderu. Quiciás al mundu enteru, si Moscú se ve perdíu y decide usar les sos armes atómiques. O quiciás Washington, Londres o París usen les sos armes atómiques si nun son pa colos rusos. Anque nun les usen, los perdedores vamos siguir siendo les ruses, ucraínes, europees y asturianes, si ye que nun damos una oportunidá a una diplomacia de bona fe, a la paz.
Aína diz qu’Asturies nun ta en guerra. Nun ta en guerra por autócrates como Trump, Putin o Zelensky. Nun queremos matar nin morrer por ver quién domina’l mundu. Nun queremos matar nin morrer por un árbitru compráu. Que siga’l futbol, que ruede la pelota, que gane la vida.