Primero vinieron polos socialistes y tuvi en silenciu porque yo nun yera socialista.
Depués vinieron polos sindicalistes y nun falé porque yo nun yera sindicalista.
Después vinieron polos xudíos y nun dixi nada porque yo nun yera xudíu.
Depués vinieron por min y entós yá yera sero porque nun quedaba nadie que falara en mio nome.
- Martin Niemöller.
Depués que los nazis asesinaron a 6 millones de xudíes nes cámares de gas, en Nuremberg el mundu condenó a muerte a dalgunos de los responsables y empezó a llenase de museos del Holocaustu y frases de «nunca más».
En 2025, too ello paez una farsa, pero non porque l’Holocaustu fuere mentira sinón porque ye una verdá retayada, a medies. Del rellatu cayeron los millones de xitanes, eslaves, izquierdistes y persones discapacitaes a les que los nazis quitaron la vida. Los vencedores de la II Guerra Mundial nunca incluyeron nel rellatu los 6 millones de persones que los británicos mataron de fame na India «porque nun yeren prioritaries» na llucha contra l’Alemaña nazi o los cientos y cientos de miles de muyeres y neñes que dos bombes nucleares asesinaron n’Hiroshima y Nagasaki.
En Nuremberg presentóse l’horror nazi como una anomalía histórica cuando’l xenocidiu ye una marca de la casa d’Occidente. La masacre de Bélxica en Congu, l’esterminiu de los tahínos por España nel Caribe, de los nativos americanos nos Estaos Xuníos o de los aborixes por Gran Bretaña n’Australia son namás dellos exemplos de 500 años de colonialismu européu.
Los poderosos, los executores, siempres atoparon una desplicación pa los sos crímenes. Había que llevar la fe verdadera y la civilización a los selvaxes. Había qu’acabar la guerra y salvar vides (de soldaos) asesinando a muyeres y neñes. L’absolución de responsabilidaes con desplicaciones avéranos a los nazis. Ellos tamién teníen la so desplicación: había que salvar Alemaña o, en pallabres actuales, Make America Great Again. Pue sustituyise América pol nome de cualquier estáu y tenemos el discursu de la ultraderecha moderna que, pasín ente pasu, va asumiendo la derecha, el centru y hasta delles izquierdes, como los laboristes británicos o la socialdemocracia alemana.
Nun deprendimos nada de la nuestra historia. «Nunca más» significa, en realidá, nunca más a los qu’asumimos como nuestros. Nun inclui a les sudaneses o a les palestines. Eses, pa esti discursu, son negres o marrones, sub-humanos; son númberos, una estorbisa pa poder esplotar «eficientemente’l» gas descubiertu frente a les costes de Gaza o una nueva Riviera palestina ensin palestines pa disfrute de multimillonarios. Tampoco inclui a los ucraínos, carne de cañón nuna guerra provocada por Occidente contra una Rusia que guarda recursos enerxéticos y minerales que queremos facer nuestros.
Cuando l’etnoestáu xenocida d’Israel atacó’l primer hospital en Gaza y vio que nun-y pasaba nada, yá nun se sintió obligáu a inventar más mentires pa xustificar la destrucción de tolos hospitales en Gaza. Asina va pasar coles nuestres vides n’Europa. Empezaron colos nuestros derechos d’información y espresión. Prohibieron medios de comunicación, Francia o Alemaña prohibieron les manifestaciones pro-palestines, el ciudadano européu Yanus Varoufakis nun pue entrar n’Alemaña en persona o per zoom. Gran Bretaña clasifica como terrorista a un grupu pacifista que s’opón al xenocidiu y ta metiendo na cárcel a cientos de persones acaldía, pola so opinión. Espresar otru puntu de vista conviértete n’antisemita o pro-rusu.
Yá llegó’l día que nos digan que faen falta más aviones de guerra y menos seguridá social y derechos llaborales. El gobiernu llaborista en Gran Bretaña va quitar el subsidiu a milenta neñes discapacitaes pa xubir el presupuestu militar. El gobiernu de dereches en Francia va baxar les pensiones y conxelar los sueldos pa comprar más armes. La Xunión Europea yá escomenzó a «sancionar», a quitar los medios de vida, a europees y europeos críticos. Estaos Xuníos sancionó al fiscal que lleva la causa contra Israel y a la rellatora especial de la ONU pa Palestina. ¿Qué nun van poder facer contra cualquiera de nosotres a poco que protestemos?
Por eso, dende Aína dicimos a tola sociedá asturiana que mos va la vida nello, qu’ente toes tenemos qu’obligar a los gobiernos a que nun mos cuenten más histories de bonos y malos, que callen les armes y fale la diplomacia, que Nunca Más ye pa tolos seres humanos sobre esti planeta. O bien ceo vamos ser primero cómplices y depués, cuando nun quede naide que fale por nosotres, vamos ser víctimes.