Una contestación, dende la docencia pública, al artículu del 13/09/25 de Pablo Echenique en Diario Red nel que se defenden les cooperatives d’enseñanza.
Anden los mass-media estatales esprecetaos énte la última filtración, per parte de la estrema derecha, de datos personales sobre la manera na que decide vivir una familia de gran importancia pa la política española de la última década y media. Faenlo pola gana (y necesidá) d’axustar cuentes con quien punxo pates arriba la política del estáu dende coordenaes tresformadores y nun ye l’estilu nin l’enfotu d’esti artículu’l xulgar cómo vive caún/a la so vida.
Sicasí, esti affaire sí ta valiendo pa poner enriba la mesa cuestiones que tienen que ver colos servicios públicos que ye necesario tratar a fondo, énte rellatos como’l que plantega Pablo Echenique nesti artículu en Diario Red y que son fondamente retrucables dende posiciones d’izquierdes.
Dicíame va poco un compañeru del partíu Aína que falar de «servicios públicos» yá ye considerao, per parte de munchos sectores, como sinónimu de «servicios sociales». Esto ye: de les instituciones públiques comprometíes cola atención a les persones en riesgu d’escluxón social y non como l’entramáu institucional que texe una rede universal, usada pol común de la sociedá, en cuestiones como la enseñanza, la salú, les pensiones, el tresporte, les infraestructures y ordenación de tol territoriu, la información o la seguridá y que, cada vegada, tien menos pesu na producción o foi desaniciándose dafechu (enerxía, industria pesada, telecomunicaciones, radiotelevisión…). A esi nivel llegamos.
Lleo a xente como Echenique contra-argumentar les decisiones personales basándose n’argumentaciones de tipu individual y, qué coime, taría bono. Caún fai lo que-y paez coles sos perres ganaes xustamente y l’acosu de los periodistes de la estrema derecha, que van a por unos y non a por otros, defínense como lo que ye, asemeyándose muncho al escuadrismu. Esti proceder d’esos intoxicadores y espardedores de bulos foi mui bien contestáu, apocayá, por Gabriel Rufián nel Congresu y tien nome y apellíos. Con too y con ello, esmolécenme como docente concienciáu y comprometíu cola escuela pública otru tipu d’argumentaciones más peligroses. Vamos con elles:
Entama diciendo Echenique qu’esta pareya tan mediática nun abandona la escuela pública por unviar a los sos fíos mayores a una privada, nel sen de que sigue escolarizando a la so fía pequeña nun centru públicu que «qu’escoyeron porque tien unes metodoloxíes avanzaes (¿?) y ye una referencia educativa progresista». Primer sustu: nun sé en Madrid, pero n’Asturies tolos barrios tienen escuela pública cerca. Lo normal, lo razonable, lo que ye lo que teníemos que facer toles persones comprometíes colos servicios públicos y la sostenibilidá, ye unviar a la nuestra reciella al centru educativu más cercanu al domiciliu o al centru de trabayu de la familia, non andar «escoyendo» ente centros públicos A y B, como si compitieren. Por eso choca tanto ver, en ciudaes como Uviéu, esa retafila de SUVs qu’aparquen enriba les aceres nos centros urbanos o en barrios como La Ciudá Naranco xenerando atascos tremendos, impostaos. ¿Escoyer? ¿Qué hai qu’escoyer? Y… ¿cómo nun va andando esa reciella a escuela? Na mayoría de los casos, porque los centros concertaos nun tán diseñaos, coime, pa ser un serviciu públicu del barriu, qu’evidentemente nun lo son, sinón empreses qu’ufren espaciu de socialización llibre de probes que-yos pagamos ente toes en llugares onde les instituciones dexaron espaciu pa que s’implanten. A Ibias, a Cabrales o a Quirós nun van, non, les empreses privaes educatives, les de los uniformes de pantaloninos y faldes plisaes, a «garantizar la llibertá d’elección de les families». Namás a los núcleos con población abondo ye a onde van, sí. A facer negociu: a que-yos paguemos el chollu.
Sigue Echenique falando de que’l colexu, priváu, en cuestión (seya cooperativa o una S.L.) «reivindica valores como’l feminismu, la democracia, los derechos humanos, la laicidá o la xusticia social». ¿Pero qué piensa Echenique que se fai na escuela pública? ¿Defender el machismu, l’autoritarismu, la inxusticia o les teocracies? Anecia, Echenique: «busquen protexer a los sos fíos (…) y yo fadría lo mesmo». Sigo entrugándome: ¿tán, entós, desprotexíos los neños y neñes que van a la pública? ¿Daveres?
El discursu aguántalo too: por exemplu, ocurrencies del autor como que «axallá los sindicatos de clas fueren otra cosa y controlaren un sistema de cooperatives de maestros y trabayadores que formaren parte de la rede pública pa nun dexala al debalu, en función de los cambios electorales». ¿Cómo? ¿Escueles privaes de progres como abellugu contra los gobiernos de la derecha? ¿Ye consciente l’autor del escritu cómo y por qué nació la escuela pública? ¿Decátase Echenique d’en qué posición dexa a la Escuela Pública esti tipu d’aseveraciones?
Dixo l’economista Albert O. Hirchman que «l'abandonu de los ciudadanos de los servicios públicos (haza mutues, escuela privada…) fai que l'estáu pierda un mecanismu d'información valioso sobre lo que va mal y una fuerza interna de presión pa parar el so deterioru». Ye dicir: si les rentes menos precarizaes abandonen la sanidá o l'enseñu públicu esti degrádase; pasa de serviciu públicu, de vocación universal, a beneficiencia, a serviciu social pa escluyíos del sistema.
Por eso ye tan importante qu’eses rentes y profesionales d'esos sectores nun vayan a la privada. Por eso, cuando un/a profesional de la enseñanza manda a la reciella a la privada (concertada o non) el mensaxe que ta unviando ye’l de que la pública «nun ye pa mi» y avera un pasín más a los servicios públicos al abismu de les privatizaciones. Y podíemos siguir falando de MUFACE y les aseguradores privaes.
Choca que quien sabe perfectamente lo que ye pasar per procesos d’escoyeta públicos -frente a quien ye contratao a deu, por amiguismu-, quien conoz cómo s’inflen les notes porque la independencia ta comprometida col pagu d’una matrícula qu’esixe resultaos y quien se decata de que la prueba PAU nun engaña, siga apostando por defender la mercantilización de la educación o la sanidá. Anque fuere p’apostar por escueles llibres. Llibres, sí, de probes.