La fuelga por Palestina, agora con más sentíu que nunca
15 oct 2025 . Actualizado a las 10:48 h.Aína encamienta a tola sociedá asturiana a facer fuelga xeneral de 24 hores esti miércoles 15 d’ochobre, como convocaron la Intersindical Asturiana y el sindicatu Suatea n’Asturies. Tamién desiximos a les autoridaes del Estáu español a dexar les polítiques de posturéu y completar un bloquéu dafechu de les rellaciones económiques, militares, culturales y deportives col Estáu sionista porque l’altu’l fueu firmáu ye un guañu d’esperanza pero ta mui lloñe de la paz que necesiten palestines y israelíes.
El plan de paz de venti puntos propuestu por Donald Trump tien como únicu valor positivu que va poner fin al xenocidiu «industrial» y permitir la entrada d’ayuda humanitaria. Inclusive esto hai que tomalo con precaución. La salida de Gaza por parte del etno-estáu xenocida y apartheid d’Israel ye parcial y dende los puntos onde caltién presencia va siguir asesinando, magar que d’una manera más «artesanal». L’exemplu últimu: l’asesinatu del periodista Saleh Al-Jafarawi esti domingu 12 d’ochobre. Israel tien un historial ampliu de violación de los acuerdos que firma, l’últimu con Líbanu, onde sigue bombardiando de xemes en cuando pesie al acuerdu firmáu col gobiernu d’esi país. No tocante a l’ayuda qu’entre en Gaza, hai que recordar que primero del 7 d’ochobre de 2023 Israel controlaba tolos accesos per tierra, mar y aire a la Franxa, convirtiendo de va décadas esi territoriu nuna prisión al aire llibre onde lo que dexaba entrar taba mui perbaxo de les necesidaes vitales reales de la población gazatí.
Yá dende la propia redacción, el plan de Trump produz rocea n’Aína. Según esto, hai que «desradicalizar» Gaza p’acabar col terrorismu. ¿Qué pasa col terrorismu y el radicalismu israelí? Nun pue ser que los únicos responsables de la paz seyan los palestinos y que nun se desixa responsabilidá nenguna al etno-estáu terrorista, apartheid y xenocida d’Israel.
La distorsión del llinguaxe llega al tratamientu que se da a los seres humanos que retién Hamas y a los que retién Israel. Según esto, Hamas tien «rehenes» y Israel tien «prisioneros». Non, son toos rehenes. Hai que recordar que les miles de neñes, neños y adultos nes cárceles israelíes fueron «xulgaes» por tribunales militares con porcentaxes de condena del 99.7%. Hai que recordar qu’Israel niégase a lliberar a persones como’l pediatra y neonatólogu Hussam Abu Safiya que, como miles de palestines, ta en prisión indefinía y ensin cargos. Abu Safiya o’l doctor Marwan Al Hams nun son criminales, son médicos secuestraos por salvar vides. Son, como decenes de miles de palestines, unes rehenes del terrorismu israelí.
El compromisu sionista pa cola paz ye nulu. Niéguense a aceptar un gobiernu de Hamas, de l’Autoridá Palestina o de cualquiera que seya palestín. Un presu políticu víctima de la represión d’Israel ye Marwan Barghouti, políticu deteníu illegalmente en 2002 pol exércitu ocupante d’Israel y condenáu arbitrariamente por un tribunal militar a cuatro cadenes perpétues y 40 años de cárcel. Barghouti ye un políticu más popular que cualquier dirixente de l’Autoridá Palestina o Hamas. Podía xunir a les y los palestinos y convertise nun interlocutor válidu pa la paz, si ye que’l gobiernu israelí del ultraderechista Likud y coaligaos fascistes quixere una paz real. Ye tamién un rehén y el sionismu niégase a incluyilu nos intercambios de rehenes.
Pararon les bombes, sí. Pero queda too por facer pa llegar a la paz. N’Aína tamos convencíes de que nun habrá paz hasta que vuelvan a casa toles rehenes palestines, hasta que Netanhayu y demás criminales de guerra israelíes seyan xulgaos en La Haya, hasta qu’acabe l’apartheid, hasta que se balten tolos asentamientos illegales en Cisxordania y Xerusalén Este, hasta qu’Israel retire les sos tropes d’ocupación de toa Palestina, hasta que les palestines tengan un estáu vidable propiu que gocie de les mesmes garantíes de seguridá qu’Israel.
Agora más que nunca, fai falta recordar too esto a la sociedá y les instituciones asturianes, al gobiernu del Estáu español y a la comunidá internacional. Pola paz y la xusticia. Pola nuestra propia humanidá.