Fai un añu que finó dafechu l’algaraván finu (Numenius tenuirostris). Declaráu oficialmente estintu ye la primer ave desapaecida de la Europa moderna.
Les causes foron: la caza intensiva nes migraciones. Los cambeos nel usu del suelu pola mor de la ganadería. El so patrón migratoriu específicu foi vulnerable a l’alteración de los hábitats del so percorríu. El caberu contautu rexistróse en 1995.
Ye la primer ave desaniciada na Europa continental moderna, dempués de les otres dos tamién europees.
Una foi l’alca xigante (Pinguinus impennis), que nun yera quien a esnalar y la otra’l llampariegu de Canaries (Haematopus meadewaldoi), que careció la presencia humana y la predación poles rates y gatos.
Ye l’avisu dramáticu pa les otres aves d’Europa amenazaes pola perda d’hábitat, la caza y lo cambeos nel usu del suelu. Les especies migratories son fráxiles énte les aiciones humanes.
Poro, fai falta reforciar les zones de conservación pa la so proteición pa que nun repitan el so destín, dempués de millones d’años d’evolución.
La sesta estinción masiva yá ta presente y tien una causa antropoxénica. Esti cabudañu ye un recordatoriu murniu énte’l cambéu climáticu del antropocenu. Somos una especie dominante de casualidá na evolución con un impautu ablucante na biota planetaria.
La capacidá de la intelixencia na práutica nun mos fizo meyorar la vida en conxuntu sinón ponela en riesgu.
Esta estinción causada pol home xorrez con muncha velocidá.
Al traviés de la caza, l’alteración de los hábitats y la colonización biolóxica de tolos ecsistemes, la bayura de la Tierra amenorga en gran magnitú.
Ye imposible documentar la desaparición de toles especies, inclusive enantes de conoceles, polo qu’hai de concienciase del mal camín del ser humanu (Homo sapiens) pal caltenimientu la biodiversidá y el frenu del cambéu climáticu provocáu.
La cris biolóxica d’esta sesta extinción pue llevanos per delantre como una especie de tantes.
Porque magar seya la dominante ye la que fina col restu por sobreesplotación, deforestación, sobrepoblación, contaminación y amás ye la que tien la capacidá d’autodestrucción, arreyando’l desaniciu del restu d’especies.