El mou de comunicase de los xibartes (Megaptera novaeangliae), ballenes pergrandes dicá los 16 metros de llargor y 36 tonelaes de pesu, prietes pel llombu y ablancazaes pela barriga y aletes pectorales llargues, y ente otros cetáceos, ye únicu nel reinu animal. Ye de les especies más especializaes nel mundiu animal, emplegando lleis de la comunicación humana n’edaes tempranes, según apruz na revista Science esti añu.
Los cantares de los machos puen durar 30 minutos y organizase en secuencies xerárquiques de soníos, que puen sentise a miles de quilómetros. Tamién les femes vocalicen. Y dambos los dos xéneros gruñen, ximen, bramen y lladren. Magar nun seya un llinguax, constitúi un sistema de comunicación complexu, al nun ser un llinguax con significáu semánticu. Que pue tresmitise ente poblaciones. Cumpliendo daqué rellacionao cola seleición sexual.
Les estremaes poblaciones siguen rutes migratories específiques y emiten cantares estremaos, que los miembros d’un mesmu grupu puen deprender y modular col tiempu. Produzse d’esta miente una tresmisión cultural evolutiva. Correspuéndese a dos principios llingüísticos d’eficiencia comunicativa que tamién se dan nos humanos: la llei de Zipf y la llei de Menzerath.
La primer llei describe que nel llinguax humanu les pallabres más comunes son más curties y más frecuentes. La segunda llei afita que les cadarmes llargues fórmense son elementos curtios. Los xibartes intercambien xunidaes estadísticamente coherentes, mesmo que’l llinguax infantil pa la deteición de pallabres d’una conversación nel fluxu continuu de la fala.
Descubrióse qu’una oncena d’especies de cetáceos empleguen la segunda llei, mentantu que namái dos, los xibartes y les ballenes azules cumplen amás la primer llei. Los xibartes foron la única especie que siguió la primer llei al nivel amosáu polos humanos.
Agora queda descifrar el significáu del cantar de los xibartes nel so comportamientu pa saber si tien solo función social, como alertes de peligru, o tienen una función de braeru intercambiu de vocalizaciones non aleatories. La ciencia sigue nel camín d’interpretar el cantar de les xibartes y la so comparanza col llinguax humanu.
Entá queda muncho que deprender d’esta singular especie de mamíferu Marín qu’anque ye rara de ver nel Cantábricu, salió de la categoría d’ «En peligru de desaniciu», cola prohibición de la so caza comercial. Anguaño catalógase pola UICN, Xunión Internacional pa la Conservación de la Natura, en «Preocupación menor», ensin amenaza. Magar los enguedeyos coles redes de pesca, la contaminación acústica y los choques con barcos. El riesgu que cuerren ye la menor cantidá de cantares col aumentu de la contaminación de los océanos.
Los sos 80.000 exemplares puen alcontrase en tolos océanos del planeta. Y el so estudiu científicu continuáu pue apurrir más novedaes.