Nel mes de payares pasáu, el Gobiernu d’España entamó la campaña informativa «España en libertad» pa conmemorar y sensibilizar a la sociedá sobre la recuperación de la democracia y los drechos dempués de la muerte del dictador Franco en payares de 1975. Asturies y España llograron nesti tiempu avances en derechos civiles, pero entá cuntamos con una carencia de derechos nel nuesu territoriu: la de la reconocencia de derechos llingüísticos pa los faltantes d’asturianu y d’eonaviegu pola ausencia de declaración d'oficialidá nel nuesu Estautu d’Autonomía.
El restu de territorios con llingua propia, como Galicia, la Comunitat Valenciana o Baleares aprovecharon esa llegada de la llibertá p’aplicar también una llibertá llingüística después de munchos años de represión, avanzando nesi sen nos sos respectivos Estatutos d’Autonomía coles declaraciones d’oficialidá de caúna de les sos llingües. Asturies nun llogró llegar al altor de protección que merez y precisa l’idioma, lo que xeneró y mantién una situación de desigualdá y enanchó'l conflictu llingüísticu nestos cincuenta años.
L’ausencia de la declaración d’oficialidá pa les lllingües propies d'Asturies xenera una situación de desigualdá y discriminación más propia del tiempu del que tamos conmemorando la so fin, que d'una democracia europea. Por ello, ye menester después de 50 años del fin del franquismu llegar por fin a un consensu ente los partíos mayoritarios y resolver esta anomalía hestórica que supón 50 años de delda constitucional col asturianu.
Dempués de la muerte del dictador llegó’l tiempu de la busca d'un alcuentru constitucional. Esi esfuerciu común nel que políticos de diferentes colores, visiones y sensibilidaes llograron algamar alcuerdos, permitieron la llegada de la convivencia constitucional y la democracia, con toles deficiencies que pueden apuntase, pero con avances en derechos de tou tipu. Tamién nel ámbitu llingüísticu llegaron los derechos, afitando na Carta Magna'l drechu de les comuidaes a facer oficiales les sos llingües, persiguíes hasta entós, al traviés de los sos Estatutos d’Autonomía, como espresa'l documentu constitucional nel artículu 3.2 «Las demás lenguas españolas serán también oficiales en las respectivas Comunidades Autónomas de acuerdo con sus Estatutos». Evidentemente, esta previsión consticional nun s’aplicó nel nuesu territoriu, xenerando una situación desigual en munchos ámbitos: financiación estatal y europea, carencia de drechos llaborales pal profesoráu de les llingües propies d'Asturies, discriminación y falta de reconocencia en drechos llingüísticos, etc.
Tamos a poques d’entrar nel añu 2026. Dientro de dos años, nel 2028, van celebrase cincuenta años del sofitu de la sociedá asturiana y española en referéndum a la Constitución española qu’afitó valores de respetu, alcuentru y convivencia. Esos valores algamáronse, con toles dificultaes y condicionantes d'una dómina escura, gracies al alcuerdu frente a la división, al consensu frente a la discrepancia, a la convencia frente al descarte; llogrando poner d’alcuerdo a perfiles políticos mui distintos. N'Asturies volvió intentase esti añu y, anque tuvimos cerca, nun foi posible, los votos en contra de PP, VOX y Foro evitáronlo.
Güei, 50 años más tarde, ye’l turnu de la clas política asturiana pa reeditar esos pactos consitucionales de convivencia, como creyemos firmemente n'Iniciativa pol Asturianu: frente al negacionismu y la esclusión llingüística ye’l momentu del alcuentru y el consensu constitucional de la clas política asturiana pol futuru de les nueses llingües. Ye'l momentu de trabayar dende yá pa qu'en 2028 soplemos eses cincuenta veles de la Constitución Española col trabayu fechu y la previsión constitucional d’oficialidá pal asturianu aprobada.
El PP tien que se sumar a esti consensu, como lo fixo en Galicia, Baleares, Cataluña, Valencia... coles sos llingües propies. Nun vamos cansar de recorda-yos que nun ye de recibu que defendan la oficialidá en Galicia y equí quieran dexar a les nueses llingües con menos oportunidaes de futuru. Tenemos de ser claros y espresar bien la urxencia que supón: ensin oficialiá l'asturianu va tener bien difícil llegar al sieglu XXII. Hai que tomar midíes yá. Anque hai otres midíes que tienen de ponese en marcha yá con mayor impulsu del que se ta faciendo, la oficialidá ye la de mayor importancia estratéxica a llargu plazu. Depués de 50 años de delda constitucional, l’asturianu, la sociedá asturiana, merezlo.