L’imperialismu desbocáu de la potencia americana dende la segunda presidencia de Trump aporta a la llende d’amenazar cola invasión d’un territoriu que depende de Dinamarca, estáu miembru de la XE. Pesie a ser aliaos tradicionales, permitir una base militar norteamericana na islla, ser los dos miembros de la OTAN, nun ye garantía que torgue una hipotética guerra ente estauxunidenses y europeos.
Groenlandia, habitada intermitentemente por pueblos amerindios dende metanes del tercer mileniu e.C., ye de los groenlandeses, según la cabera encuesta fecha nel país, entidá autónoma de Dinamarca, como les islles Faroe. Y ta protexida pol drechu internacional.
El groenlandés, del tueru esquimu, inuit con alfabetu llatinu, ye la única llingua oficial de Groenlandia dende 2009. Hai unos 57.000 falantes nes sos costes, sobre manera na occidental. L’Academia del groenlandés llámase Ogaasileriffik. Ye una institución dependiente del Ministeriu de Cultura, Educación, Investigación ya Ilesia. Dende 2023 pue usase nel Parllamentu danés.
Les rellaciones esteriores y la seguridá groenlandeses son competencia del Reinu de Dinamarca. Que por ser de la XE taríe protexíu por tolos miembros de la organización en casu d’ataque, según apruz nel articulu 42.7 del tratáu européu.
Porque vese a cara perru que yá nun val esa mesma política de defensa común dientro de la OTAN como afita’l so artículu 5, porque l’amenaza provién d’otru miembru, los EE.XX. La pauta d’esti país ye amenazar y trespasar les llendes dempués de ver que nun hai problemes, col usu de la fuercia militar, como fai en Venezuela, por exemplu a cuenta del petróleu. Y tamién a Canadá, o Panamá, pol enclín imperialista.
En Groenlandia la sida son les tierres rares que dexa al descubiertu el descensu de la capa de xelu qu’anubre’l 80% del país, pol cambéu climáticu. Considerada una nación componente de Dinamarca, ta venceyada dende va un mileniu a la Europa nórdica.
Nun hai que descartar la posibilidá de que’l presidente norteamericanu ordene un ataque a suelu de titularidá europea, cuestión que nun descarta en públicu, y que tolos estaos miembros de la XE tean abocaos a la so defensa. Un fechu impensable hasta va poco, que pue facese una realidá distópica énte les famientes demandes de calter económicu de Trump. Que yá nomó a un unviáu especial pa tentar d’algamar la mayor islla del océanu Atlánticu per aciu de la so anexón por “seguridá nacional”, el so eufemismu favoritu pa cualesquier agresión territorial verbal o real.