«Afayaízu» nun ye placentero. Pue ser que se traduza así, pero tarán conmigo en que nun ye lo mesmo. Otra posibilidá sedría sustituyilu por confortable o agradable, pero en nengún casu llogra axuntar tolos matices del nuestru axetivu.
Si mio padre me comenta que mercó bocartes, ye un martes más; si me diz que güei piensa comer boquerones, entós imaxínomelu metíu nun Alsa con destín pa la Gran Vía de Madrid. Si siento a mio madre dicir qu’hai muncho que nun come unes andariques, recuérdola rechupando les pates y prestándo-y pola vida; si me diz qu’echa de menos las nécoras, camiento que ta complicada nuna operación contra’l narcotráficu. Méteste una fartura con amistaes o cola familia, pero pa comer en abundancia o exceso tienen qu’invitate a una urbanización de La Moraleja col deu munín arrechu.
Alcuérdome d’escuchar na radio al profesor Luis Arias Argüelles-Meres contar la cara que punxo un matrimoniu de Madrid cuando un pescaderu de Cuideiru-y entrugó a la muyer si quería que-y llimpiara’l potarru. Más allá de malos entendíos con gracia o de la sorpresa de les tos amistaes castellanes cuando-yos pides que pasen a picate, l’asturianu perpasa cualquier clas d’homologación axustadamente aséptica. Ye, de dalguna manera, la nuestra manera de ver el mundu. Que nun ye nin meyor nin peor; ye, cenciellamente, la qu’algamamos.
Pa que la nuestra llingua sía esta, la Xunta Xeneral del Principáu d’Asturies tuvo que declara-y la guerra a Napoleón y mandar embaxadores a Londres pa pidir ayuda. Pa qu’usté y yo sintamos la señardá, esti trozu de la Península tuvo que convertise nel corazón industrial d’España y texer ún de los movimientos obreros más potentes y lluchadores de la Europa de finales del XIX y principios del XX. Pa qu’en Nuechebona comamos pitu caleya y non gallo de calle estrecha, aquellos mineros y les sos families protagonizaron güelgues que retinxeron en tol país p’acabar alzándose n’armes reclamando un xiru socialista nel 34. Pa poder ser llambiones en lugar de golosas, Alberti tuvo que escribir «mi mano y mi corazón ¡contigo!, que Asturias grita como ayer: ¡Viva el Nalón y viva la dinamita!». Y, en fin, pa tener chigres amás de bares, Asturies tuvo que superar la reconversión industrial, el declive y les lleendes urbanes, reinventándose a sí mesma una vez tres d’otra pa llegar hasta equí. El viaxe milenariu de la carne esguilando pelos sieglos y los güesos, que diría Ángel González.
Cerca de 40 años lleven penitenciando d’escuela n’escuela los nuestros y les nuestres docentes d’asturianu. Esíxen-yos los mesmos requisitos, la mesma formación qu’al restu, pero nun tienen places propies. Cuatro décades d’interinidá reclamando que los equiparen llaboralmente a los sos compañeros y compañeres.
Fixeron falta primaveres, branos, soles y llunes pa ser una faltosa, tar como una maniega o ponese farrucu. Asturies, que siempre llegó a tiempu a la historia, llega tarde a la oficialidá de la so llingua y a la reconocencia del so profesoráu.