Asturies, un pasu alantre
OPINIÓN
Les eleiciones d'esti domingu pasaú n'Andalucía tán dando muncho de qué falar y, dende Asturies, a un añu vista de tener que dir a les urnes, puen facese delles llectures.
De mano, los comicios del domimgu confirmen una cambiu de tendencia nel tableru políticu européu: hai una nueva exa ideolóxica que condiciona’l votu y la participación, y que va más allá de la tradicional izquierda-derecha, ello ye, la exa que contrapón lo territorial de lo sucursal (anque tamién pue facese referencia a ello como exa «cerca-lloñe»).
Per otru llau, ye posible facer un segundu análisis tocante a la entruga: ¿ónde s’abelluguen la ilusión y l'enfotu? Y la cuestión nun ye poca cosa. Porque cualesquier integrante d’una organización política tien qu’entender qu’a la hora de salir a votar, tantu pesu tien la razón como la emoción. Y les dos emociones que güei mueven el votu son l’odiu y la ilusión.
Col primeru, a la izquierda enxamás-y foi bien y ye’l qu’emplega’l facismu pa movilizar electoráu (esi famosu «cuantu peor, meyor»). Poro, la ilusión ye, a la fin, la única emoción que permite coneutar a la izquierda cola xente. Pero, volviendo a la entruga d’ónde s’asitia güei la ilusión, les estremaes cites eleutorales d’estos dos años postreros dexen clara una cosa: namás los proyeutos apegaos al territoriu, aquellos que ponen el centru de la so actividá nel mesmu suelu que pisen los sos vecinos y vecines, aquellos que convierten la identidá del territoriu (llingua, cultura, tradición…) nuna seña d’inclusión, acoyida, progresu y respetu, son los que xeneren enfotu, apegu y ilusión. Son los que tresformen.
Dicía Antonio Maillo (coordinador federal d’IU y candidatu de la coalición) l'otru día nuna entrevista que-y facía Angels Barceló y n’alusión a la formación andalucista, Adelante Andalucía, «si hay siete organizaciones que nos unimos en una misma candidatura y hay uno que no, esto es como los siete coches que van en una dirección en la autopista y hay otro en contra y piensa que los siete van de manera incorrecta (...)». Maldita hemeroteca. Adelante Andalucía pasa p’enriba de los 400.000 votos y moviliza a 138.117 persones más que la coalición qu’encabezaba Maillo xunto a siete organizaciones.
Y ye que nesto de la política, tampoco funciona el cuantos más y más xuntinos, meyor. Y los andalucistes recalcáronlo munches, munchísimes veces, dende cuantayá. Dos formaciones distintes, con metodoloxíes distintes, esquemes mentales distintos, aspiraciones distintes, estratexes distintes y arume distintu, lo normal ye que faigan caminos distintos. Y esa ye la coherencia política que, mui probablemente, l’electoráu andaluz premió. Porque nun pue ser una solución dir de la mano de quien, d’una manera o d’otra ta en gobiernos que son parte del problema y qu’aspira a seguir formando parte d’ellos. Llectura, estratexa y campaña política impecable d’Adelante Andalucía. Que sigan, firmes, apegaos al territoriu y faciendo’l so camín.
Y, de lo nuestro, ¿qué? A finales de marzu, Aína Asturies salió con un mandáu del so Congresu: que nel horizonte eleutoral de 2027 heba, nesti territoriu, un polu políticu asturianu. Poner la intelixencia de la organización, la so lloxística, les sos manes, el so enfotu y la so ilusión pa qu’en tolos colexos eleutorales del país heba una papeleta que represente esi sentir. Un polu políticu propiu p’Asturies que fraye’l vieyu y tradicional tableru políticu y onde’l so papel nun seya afitar otru gobiernu más de la FSA-PSOE y les sos polítiques que, por mentar namás varies, abren la puerte a trés universidaes privaes, nun ponen llendes al deterioriu del sistema públicu de salú, afiten el modelu de la escuela concertada en detrimentu de la escuela pública, dibuxen una economía terciarizada dafechu con modelos como’l de COSTCO en cuenta de tener una planificación industrial qu’apurra un verdaderu ecosistema d’innovación industrial o, tamién, polítiques que consiguen tener dende va un añu a les trabayadores de Les Escuelines nuna fuelga permanente. Pa tratáse del gobiernu más progresista y reformista de la historia asturiana, nun ta nada mal la cosa.
A un añu de les eleiciones, esi Polu Políticu electoral asturianu ye una necesidá. Ye tiempu de siguir trabayando por ello. Aína tien el mandáu de facelu realidá y de ponese a la xera. De facer y andar esi camín. Porque camín hailu. Y país que respuenda a ello, tamién. Poro, ye tiempu de qu’Asturies dea tamién un pasu alantre. Hai camín.