Nun puedo velar la mio película favorita. Antes siquiera d’alcuerdame de que terminó, puedo ver la secuela, la precuela y dacuando hasta’l remake. Si nun tien secuela, lo más probable ye que tea en desarrollu, polo que puedo buscar información sobre esti nuevu proyectu y escaecer la película que acabo de ver.
De la mayoría de les comedies romántiques de los 2000 tán saliendo secueles; la más reciente: El diablo viste de Prada 2. Una continuación desvaída en comparanza cola so predecesora. Dambes, más allá del títulu, apenas comparten semeyances: dende la estética hasta l’humor, too paez apagase. Nin siquiera Meryl Streep ye capaz de llevantar la película.
Sicasí, foi una de les películes más taquilleres d’estes selmanes. ¿Ye la nostalgia la que compra agora entraes? Sí. Pero creo que tamién responde a la falta d’un productu. Nenguna de les mios amigues vio nel so día El diablo viste de Prada nel cine; vemosla en Netflix o na plataforma pirata de turnu y, aun así, la mayoría queríamos ver la segunda nel cine. Creo que ta xunío a la escasa producción de comedies romántiques.
¿Cuántes comedies romántiques decentes s’estrenaron nos últimos años? Quiciabes Todos menos tú y Materialistas. Anguaño, la producción de comedies romántiques ta en decadencia. Sí, prodúcese romance: toos podemos ver n’Amazon Prime Video les adaptaciones de noveles de Wattpad col típicu mozu malu y la moza bona ya inocente, o podemos consumir dramas románticos agridulces. Pero nun hai comedies romántiques. Nun ta esa esencia qu’hubo nel cine clásicu de los 50 nin la que depués volvió nel dichu xéneru de los 80 y más tarde nos 2000. ¿Puede ser que yá morriera’l romance? ¿O somos nós los que dexamos de creer nél y yá nun cantamos All by myself a pulmón abiertu por tar depres cola nuesa vida amorosa como Bridget Jones?
Nun me paez que nós cambiáramos tanto. Al final, toos cantamos La Perla de Rosalía a pulmón abiertu. Polo que’l quid de la cuestión nun ta en nós. El quid ta en que agora podemos permitinos finales más infelices. Los finales felices paécennos irreales, demasiado… perfectos.
Hai defensores de la idea de que, en tiempos duros, mientres les guerres, necesítense más finales felices, conclusiones optimistes pa aplicales na vida real. Por eso se produxeron tantes comedies romántiques mientres la Segunda Guerra Mundial y la posguerra. En Sullivan's Travels esplicen esta idea nuna sola secuencia: dempués de perdelo too y ser probe per primer vegada na so vida, Sullivan, un director pretenciosu, entiende lo importante que ye facer rir a les persones al ver xunto con presidarios y persones discriminaes una película. Esi final feliz ye l’única allegría que tienen.
Al final de la película, Sullivan acepta dexar d’intentar ser un director de renome pa facer rir a la xente y da-yos esos finales. Amás d’esos finales, na actualidá fáltannos tamién grandes estrelles de les comedies romántiques: nun tenemos la nuesa Katharine Hepburn y Cary Grant o los nuesos Meg Ryan y Tom Hanks. Somos güérfanos del romance.
Y el problema, más allá de directores y estrelles, ye que Hollywood paez rindise con esti xéneru; regalólu al streaming. Eso lleva a que se faigan películes rápides, feches por facer, pa consiguir beneficios rápidos y ensin gastar demasiáu dineru.
Probablemente nós, como espectadores, tamién compartamos parte de la culpa. Cada vez somos más escépticos y, por eso, funcionen bien les secueles, onde yá conocemos a los personaxes, los llugares y la historia. Ye más fácil creyer nun final feliz si conocemos a los personaxes. Conformámonos con que nos saque una sonrisina nel cine y nun-yos esiximos ser la película de la nuesa vida porque ye una secuela.
Igual inclusive’l propiu xéneru tien parte de culpa, siendo películes que siguen siempres la mesma premisa. Tienen de sentise orixinales al mesmu tiempu que paez que ye la primer vegada que nos cuenten que una moza conoz a un rapaz, enamórense, superen xuntos los obstáculos del destín y acaben xuntos.
Quiciabes haya que volver a creer en que moza conoz rapaz; nel deséu de Darcy y Elizabeth Bennet, en ser tan desastre como Bridget Jones o tan caótica como Katharine Hepburn.
Quiciabes tengamos que creer nos nuesos propios finales felices y dexar de ligar por Instagram.