Güei escribo una nueva parrafada, esta prometo que sedrá más curtia, pa reafirmar una propuesta que pretende solucionar eso de: «Cases per teyaos y problemes del subsuelu».
Por riegla xeneral tamos avezaes a construyir alternatives elleutorales ensin procesos de construcción política coleutiva ente les fuercies y simpatizantes, posibles votantes, que constituyiríen esa famosa alternativa.
Asina, les más de les veces, eses «coaliciones», eses «plataformes elleutorales» apauten dende les sos direiciones posibles alcuerdos. Munches discusiones alrodiu de les famoses llistes, «cuotes de poder», desafeición de les militancies de los partíos protagonistes por alcuerdos «artificiales» o «posibilistes», etc.
Como yá vine diciendo n'otros llugares, considero humildemente, que la meyor manera d'armar daqué sóledo que permita gobernar n'Asturies dende una perspeutiva asturiana y tresformadora ye entamar dende abaxo (conceyos-comarques-país) trabayando nel marcu programáticu. Ye dicir, entamar por consensuar les propuestes. ¡Y cuidao! Que tando a un añu de les elleiciones hai tiempu precioso pa entamar yá.
Por ello plantegaba que les fuercies que se dicen asturianes y tresformadores habríen de, conceyu a conceyu, facer xornaes de trabayu conxunto sobro diagnósticu, necesidaes y soluciones con midíes concretes. Repito, conceyu a conceyu. Analizando'l territoriu inmediatu dende les agrupaciones qu'esistan de cada fuercia elleutoral, asina como vecines y simpatizantes que quieran participar d'esi procesu. Tamizando los consensos algamaos, y separtando momentáneamente los disensos, pa poder conocer claramente de lo que tamos de mano d'alcuerdu, y qué aspeutos tendremos de trabayar como disensos. Una vez fecho esti exerciciu, faise'l mesmu procesu biorrexonal o comarcalmente: analís de la comarca, diagnósticu, necesidaes y soluciones con midíes concretes. Tamizando consesos y separtando momentáneamente los disensos. Darréu, faise'l mesmu procesu a nivel autonómicu recoyendo amás los consensos municipales y comarcales.
En teniendo esto, yá podemos falar de configurar llistes. Y como procesu que se plantega dende abaxo, eses primaries habríen de ser abiertes y personales; votando nella toles fuercies atropaes altraviés de los procesos de conformación de midíes. Toes estes fuercies elleutorales tienen censos claros que-yos permite facer les propies llistes en primaries en casu de que se presentaren per separtao. Asina que, axuntando censos, sabemos quiénes de mano puen votar. Amás d'ello, plantegaría un espaciu temporal abiertu a inscripción hasta una fecha consensuada que permita votar a persones individuales que nun tán necesariamente adscrites a dengún censu de partíu.
El resultáu xenerará, por tanto, una llista elleutoral que respuende non al partíu al que pudieren pertenecer eses persones, sinón a los consensos algamaos nel procesu coleutivu de conformación de les midíes programátiques enantes descritu.
Por supuestu, la persona que fuere más votada sedría la presidenciable. Pero... ¿Cuál sedría la composición del gobiernu?
Como vecín ensin afiliación denguna y que nun me presento en dengún procesu, quinxere facer una propuesta de cómo creo que sedría la meyor organización y quiénes, dende la mio humilde opinión, deberíen lliderar eses conseyeríes de gobiernu. Per orde alfabéticu y con ello termino:
Conseyería d'Alministración Llocal y Conceyos: Esmeralda Palacio Cortina
Conseyería de Bientar y Drechos Sociales y Ciudadanos: Marian Lobo González / África Preus
Conseyería de Cultura y Política Llingüística: Inaciu Galán
Conseyería d'Educación: Beatriz Quirós
Conseyería d'Equidaes y Diversidá: Nuria Rodríguez
Conseyería d'Emerxencies y Xestión Forestal: José Manuel Lago Méndez
Conseyería de Facienda: Gema Álvarez Delgado
Conseyería d'Industria, I+D+IC, y Dixitalización: Lorena Gil Álvarez
Conseyería d'Infancia, Mocedá ya Interxeneracionalidá: Claudia Lera
Conseyería de Mediu Ambiente y Patrimoniu Natural: Paco Ramos / Beatriz González
Conseyería de Memoria Democrática y Patromoniu Monumental y Arqueolóxicu: Faustino Zapico Álvarez
Conseyería d'Ordenación del Territoriu, Movilidá, Vivienda y Turismu: Ícaro Obeso Muñiz
Conseyería de Participación y Política Comunitaria: Juan Ponte
Conseyería de Presidencia, Rellaciones Institucionales y Demografíes: Delia Campomanes Isidoro
Conseyería de Ruralidaes y Polítiques Agraries: Lluques Díaz
Conseyería de Sanidá y Deporte: Covadonga Tomé
Conseyería de Xusticia: Miguel Ángel Presno Linera / José Manuel Pérez Fernández