Una compañía bioteunolóxica estauxunidense presentó na revista Times a trés llobatos guargu, una especie estinta. La desestinción d’especies ye un campu de la ciencia a la gueta de revivir especies estintes usando téuniques como la clonación, la edición xenética y la hibridación seleutiva. Exemplos como’l citáu o’l del mamú llanudu, el dodó, el tigre de Tasmania y otros en marcha son dellos d’una llista que xorrez. Tres d’ello, quieren patentar los animales pol so porgüeyu económicu.
L’alderique céntrase en cuestiones étiques de remanar la natura, l’impautu ecolóxicu de les nueves criatures y el costu innecesariu mientres hai especies vives en peligru de desaniciu. Desendolcaríase un nuevu problema pal mediu ambiente. Los neoanimales nun son idénticos a los estintos, nin los sos ecosistemes de los que sedríen invasores. Amás apurriríen virus agora inertes, nueves plagues que podrían espardese mui rápido si se fai con especies d’aves migratories.
Xugar a dioses, re-xenerando especies finaes va tiempu, ye una temeridá de consecuencies incalculables. Qu’una cosa puea facese nun ye necesario qu’implique que se faiga. La desestinción trai arreyáu un xeitu de soberbia, nun tiempu nel que desapaecen especies pola aición humana.
Los recursos emplegaos neses quimeres, habríen d’empobinase a torgar la sesta extinción masiva qu’arrampla con tantes especies pola mor del efeutu antrópicu nes sos poblaciones, yá seya direuta o indireutamente. La perda de biodiversidá y el cambéu climáticu son los elementos más graves a los que facer frente nesti planeta. Nun ye plan revivir animales y a la llarga quién sabe qué. Lo urxente ya importante ye frenar el calecimientu global y amenorgar el ritmu de la estinción d’orixe antrópicu que carez el mundiu.