Dos trenes avancen en sentíu contrariu pela mesma vía. En medio, Asturies y les asturianes tamos viendo que les dos máquines s’averen y van estrapayanos. Si se cumple lo que dicen les encuestes, paez que’l fascismu ta tocando’l poder colos deos de la mano del PP. ¿Ye pasase trés pueblos llamar fascismu a Vox? Toles asturianes acaben ver a militantes de Vox faciendo’l saludu fascista mientres atacaben a l’Acampada de La Escandalera, nun fai falta esplicar muncho más. Quiciás quieran deprender el saludu a los neños nes escueles. Eso sí, nun van ser escueles publiques porque van acabar con elles, igual que van acabar cola sanidá pública y coles ayudes publiques a los “vagos”, como la del paru. Toes tuvimos nel paru en dalgún momentu de les nuestres vides. Asina que yá los sabéis, somos toes unes pedigüeñes qu’hai qu’eliminar.
Ési ye ún de los trenes. L’otru ye’l tren d’una idea centenaria que mos vien pasando penriba dende va 50 años (por nun dicir 150): Asturies madre d’España que se tien que sacrificar pola fía, mos dicíen les dereches nos años 80 del sieglu pasáu pa que n’Asturies nun pidiéramos autogobiernu con poder pa decidir nosotres sobre les nuestres vides. Somos riques, mos dicíen esos mesmos años les izquierdes estatales con sucursal n’Asturies, y tenemos que ser solidaries colos demás territorios del Estáu. Arrenunciemos a pidir lo que mos fai falta, a decidir qué ye lo que queremos pa nosotres.
Agora esa «madre» solidaria ye probe y ta sola, les sos criatures abandonaron cuantayá’l ñeru y nun miren pa la casa en ruines que dexaron atrás. El 29 del mes que vien, les trabayadores d’Asturies y de tolos demás pueblos del Estáu español xugámosnos el pan y la vida nes eleiciones anticipaes que convocó’l gobiernu d’España. Asturies apurre siete diputaes pa ver d’aparar esa mareona fascista qu’amenaza con traganos. N’Aína somos conscientes que les izquierdes nel país y en tolos países del Estáu español tenemos qu’atropar el másimu de votos pa que les trabayadores nun perdamos los nuestros derechos y les nuestres vides. Al mesmu tiempu, n’Aína sabemos que les necesidaes de les asturianes son diferentes a les de les estremeñes, les catalanes o les madrileñes. Pa solucionar los problemes específicos d’Asturies, faen falta diputaes que vayan al Congresu a votar coles asturianes na mente, non col carné del partíu na mano.
L’apuesta nun pue ser más alta, por eso la xenerosidá de toes tien que ser total. Y nun fai falta esperar poles órdenes de Madrid. Asturies ye una circunscripción eleutoral, asina que podemos decidir soles la manera meyor p’aparar el fascismu nel Estáu español y defender la vida de les asturianes.
Nesi exerciciu de xenerosidá total, Aína arrenuncia a presentar candidates propies a les eleiciones estatales y propón a toles izquierdes n’Asturies que nos xuntemos nuna única llista ensin políticos de carrera, nuna Candidatura de País. Proponemos que toles izquierdes n’Asturies deamos un pasu a un llau y presentemos un candidatu o candidata de la vida asociativa, sindical o cultural que mire poles asturianes y pare’l fascismu nel Congresu del Estáu español. ¿Sedremos quién pa dexar de miranos l’embeligru partidista y pensar en toes? El 16 d’esti mes, como muncho, tienen que presentase les llistes. Vamos sábelo entós.