Estes selmanes atrás los vecinos del barriu de L’Arena llevantámonos cola desagradable sensación de ver qué'l bientar del nuesu barriu, la necesidá d'árboles nes nueses cais, ye daqué que nun-y esmolez lo más mínimo a l'alcaldesa Carmen Moriyón. Ensin previu avisu, ensin información sobre la intervención, descubrimos que la obra qu'empezaba na cai Emilio Tuya suponía valtar más d'una decena d'árboles frondosos y sanos.
Cuando yá cortaren trés consiguimos parar la la destrucción de la naturaleza unos díes. Protestamos énte'l Conceyu, énte los medios de comunicación, improvisamos una campaña de cartelos nel barriu…
El Conceyu nun dió señales de vida, namás pa qu'un conceyal me llamara «agitador» nuna comisión. Mientres unos díes paró la destrucción, hasta qué l'informativu de TPA s’interesó pol casu y llevólu a les sos noticies del día. Énte l'aumentu del descontentu vecinal y de la repercusión mediática Moriyón decidió cortar polo sano, nunca meyor dicho que nesti casu. Dio la orde y menos de 12 hores dempués, de madrugada, pa evitar la protesta de los vecinos, valtaron tolos árboles.
Nun momentu, nel que vivimos una crisis climática na que se nos avisa de la importancia de caltener y facer crecer la vexetación de les ciudaes, el gobiernu de Moriyón, el gobiernu apautáu por Foro-PP y VOX, trabaya en contra de la ciudá amable pa la xente, destrúi árboles, con decenes d'años, que dan solombra y allegren la vida, que dan salú, faciendo desapaecer lo poco de naturaleza que se colaba ente les nueses cais.
El Conceyu diz que van reponer los árboles y fadránlo con árbolinos pequeños que van tardar décades en tener l'aspectu frondoso que teníen les anteriores. Ecoloxistes n’Aición declaraba estos díes que «la sustitución d'árboles maduros por nuevos exemplares ye una midida qu'hipoteca los beneficios d'un árbol mientres décades hasta qu'esi árbol pueda algamar el mesmu tamañu que'l reemplazáu».
La respuesta del Conceyu a les quexes foi llanzar una nota de prensa con información sobre los árboles que tienen previsto llantar na ciudá, 1.300, una cifra risible qu'apenes va permitir cubrir la reposición de los que se van retirando, cuando Xixón ta bien lloñe de la tasa qu'encamienta la OMS de 1 árbol por cada 3 habitantes en zones urbanes.
Sabemos amás que nel casu de los árboles de L’Arena, cortáronse ensin nenguna necesidá, como pudi comprobar falando col xefe de la obra. Él esplicóme como moviendo un conductu del gas, podía evitase valtar los árboles, pasando la tuberia per otru llau cercanu. Nun yera necesidá sinón despreciu al bientar de los ciudadanos y les ciudadanes, desdexamientu absolutu pol mediu ambiente, como se repara en tantes otres acciones ya inacciones d'esti gobiernu, más esmolecíu por que la solombra la dean costoses banderes solicitaes por VOX qu'árboles reclamaos por tola ciudadanía.