La candidata d'Izquierda Xunida a l'alcaldía d'Uviéu, Concha Masa, que l'oxetivu ye reforciar el compromisu cola política llingüística
25 abr 2019 . Actualizado a las 13:34 h.La candidata d'Izquierda Xunida a l'alcaldía d'Uviéu, Concha Masa, afirmó que l'oxetivu d'IX ye caltener l'área de Cultura nel mandatu próximu y reforciar el compromisu cola política llingüística al traviés de la creación d'un Serviciu de Normalización.
Masa aconceyó esti xueves con Xosé Antón González Riaño, presidente de l'Academia de la Llingua Asturiana, pa intercambiar propuestes y midíes de normalización y dignificación de la llingua asturiana nel conceyu.
Nesi sentíu, la candidata d'IX indicó que pa poner en marcha la oficina de normalización nesti mandatu yá introcieron, dende l'área de Personal col alcuerdu de los sindicatos, una plaza de Téunicu de Normalización Llingüística na RPT del Conceyu «que, a día de güei, yá ta presupuestada y incluyida na ufierta pública d'empléu de 2019 que se va aprobar nos díes próximos».
El Presidente de l'Academia destacó que «Uviéu tien que xugar un papel destacáu como capital d'Asturies» y «espera que nos cuatro años próximos se faiga una política llingüística d'alcuerdu coles espectatives y la demanda social».
Amás del cumplimientu del decretu qu'establezlos nomes oficiales del conceyu, dalgunes midíes de normalización «a costu cero» nes que coinciden tanto IX como l'Academia son, por exemplu, l'usu del asturianu nes decoraciones o carteles festivos, nos folletos turísticos xunto col castellanu y l'inglés, asina como nos formularios alministrativos y nos anuncios institucionales en prensa, radio y televisión.