Catorce años esperando un día como'l de güei, quince años esperando por un derbi.
09 sep 2017 . Actualizado a las 13:37 h.La xente más mozo nun sabrá la sensación que se tien un día como'l de güei. Munchu tiempu esperando pa venos la cara, deportivamente, colos nuesos vecinos de la capital d'Asturies.
Dos equipos que lleguen dempués de golear nos partidos de la selmana pasada y que a les 18:00 van xugase más que 3 puntos, porque'l que seya quien a algamar la victoria va salir reforzáu mentalmente dafechu.
Esti ye un día de los que me prestaría abondo ser futbolista y saltar al prau y sentir l'ambiente d'El Molinón dende abaxo, sentir tolos gargüelos canciar a una meténdo-y presión al equipu rival, y más entovía si esi rival ye'l Real Uviéu.
Pero en vez de saltar al prau a min tocóme llevantame ceo y, mientres nos vistíame de gala, despliqué-y a la mio fïa de 3 años que güei yera un día de fiesta, qu'había que vistise colos colores del Sporting, de coloráu y blancu, pa que tol mundu supiere que somos del Sporting. Ella mírame y diz que sí cola cabeza. Abrazámosnos y cantos xuntos "te queremos, te adoramos... Real Sporting de Xixón". Supi qu'ella va vivir esti día de fiesta de verdá, como de xuru lo fadrán los más de los que van ver el derbi.
Esperemos que la fiesta del fútbol asturianu nun acabe con nenguna carga policial, nin griesques físiques, namás que de cancios, fuercia y llucha deportiva y qu'esti día de fiesta, que llega dempués de 15 d'años esperando, termine colos 3 puntos, la moral pelos cielos y el derbi na buchaca de los de Mareo.