Riaño afirma que la llexislatura próxima preséntase como una «oportunidá histórica» pa la llingua asturiana
AGORA
El presidente de l'Academia de la Llingua Asturiana afirma que les «posiciones totalitaries» son un peligru pa la llingua y les llibertaes democrátiques
13 jun 2019 . Actualizado a las 18:45 h.El presidente de l'Academia de la Llingua Asturiana (ALLA), Xosé Antón González Riaño, afirmó esti vienres n'Uviéu que la llexislatura próxima pue representar «la meyor y más importante oportunidá histórica pal caltenimientu del idioma asturianu».
Nel so discursu institucional nel Teatru Campoamor pol Día de les Lletres Asturianes, onde acoyeron a los dos académicos correspondientes nuevos, l'escritor Pablo Texón y el filólogu Alberto Fernández Costales, Riaño dixo sentise emocionáu pola importancia de facer l'actu pela primer vez nun Uviéu oficialmente «Uviéu».
Leer más: «Asturies sálvase falando»
Con too, centró una parte bona del so discursu no que podría suponer la llexislatura nueva pal futuru de la llingua asturiana. Asina, esplicó que la institución que preside ta formada por homes y muyeres qu'individualmente tienen la so propia ideoloxía, polo que na Academia tán representaes toles sensibilidades polítiques pero, sorrayo, toles «sensibilidas polítiques democrátiques».
«Nun s'asitien ente nós posiciones que podríemos calificar como señardoses del pasáu totalitariu, y non solo porque sían un peligru pa la llingua, sinón porque son un peligru pa les llibertaes», esplicó.
Asina, depués de defender la neutralidá de l'Academia como la manera meyor de rellacionase «llealmente» col Gobiernu d'Asturies «sía d'esquierdes, de centru o de dereches», recordó que va haber votantes que van analizar los programes electorales mirando les propuestes en materia de política llingüística y cultural.
Nesi sentíu, una vez pasaes les elecciones, Riaño esplicó que l'Academia va tar a disposición de l'Alministración «pa siguir trabayando pola dignificación de la llingua y pol llogru definitivu del so afitamientu xurídicu».
«La llexislatura próxima pue representar, a priori, la meyor y más importante oportunidá histórica pal caltenimientu del idioma asturianu», indicó Riaño, que tamién quixo dexar claro que la institución demanda la oficialidá de la llingua porque ye asina como marca la Constitución y porque nos estatutos de l'Academia queda recoyíu'l so papel como salvaguarda de los derechos llingüísticos de los asturianos.
«Consideramos que la Constitución nun se ta cumpliendo n'Asturies», afirmó Riaño, pa indicar que na llexislatura próxima van siguir trabayando pa garantizar el futuru de la llingua y la cultura d'Asturies. «Llevamos 40 años pidiendo xusticia llingüística p'Asturies. ¿Podrá dicir daquién qu'equí hai precipitación o falta de prespectiva temporal nes nuestres propuestes», preguntóse'l presidente de l'ALLA.
Gallego-asturianu
Per otru llau, Riaño tamién tuvo tiempu pa calificar al gallego-asturianu como «un elemento máis da xuntura harmónica del noso pobo» qu'a lo llargo d'estos años «féxose máis de todos os asturianos y asturianas al marxe del sou asitiamento nel Oriente, nel Centro ou nel Occidente».
Amás, destacó l'empiezu de los trabayos pa sacar alantre'l diccionariu normativu del gallego-asturianu y que pa eso punxo en marcha una base de datos pa entamar la recoyida de material lléxicu que lleve a la fechura «d'una obra que consideramos estratéxica p'Asturies dende'l puntu de vista cultural».
