La ciudá asturiana va ser la protagonista d'una selmana d'aiciones promocionales
25 oct 2019 . Actualizado a las 10:18 h.Xixón va ser destín protagonista en Logitravel Store en Madrid. La ciudá asturiana va ser la protagonista d’una selmana d’aiciones promocionales del destín nos cines Kinépolis. Ente elles, destaca la realizada’l fin de selmana caberu nos cines Kinépolis -Ciudad de la Imagen de Madrid-, onde s’alluga la Logitravel Store. Venceyando turismo y cine, entamóse la premiere de la película d’animación La Familia Addams, na que s’afayaron al rodiu de 200 persones de perfil familiar. Enantes del pase del film, fízose una presentación de Xixón y proyeutóse un vídeu de la campaña Xixón Tu Lugar sobre los llugares más destacaos de la ciudá asturiana.
Xixón va ser el gran protagonista de los díes vinientes na axencia e viaxes física de Logitravel, onde tien un estand especial p’amosar los sos puntos d’interés turísticu y el productu que tien a la venta la OTA para viaxar a la ciudá. Amás va poder realizase cualesquier reserva in situ. Nel mesmu llugar, grabóse ayeri xueves, 24 d’ochobre, un monográficu especial del programa Paralelo20 (Radio Marca), cola participación de los sos llocutores habituales; de Carlos García-Pastor, direutor de Marketing del Grupo Logitravel; Ángela Baños, direutora de Xixón Turismu; Alejandro Díaz-Castaño, direutor del Festival Internacional de Cine de Xixón; y de Noelia de Prado, cocinera y dueña del restorán-sidrería La Cuadra de Antón, una de les sidreríes participantes na Ruta de la Sidra Xixón. El programa va emitise mañana sábadu 26 d’ochobre, dende les 09.00, en Radio Marca.
Pal fin de selmana, la presencia del destín na tienda va ser muncho mayor. Poro, la compañía punxo en marcha dellos eventos d’activación que nun van dexar indiferente a visitante dalu. Las tardes de los díes 25, 26 y 27 d’ochobre, tolos interesaos van poder averase a Logitravel Store pa prebar productos de la gastronomía asturiana, como quesos y dulces de la ruta Gijón/Xixón Goloso. Arriendes d’ello, va entamase un quiz pa que puean conocer la gastronomía y los atractivos de la ciudá. Tamién sedrá posible escanciar sidra virtualmente.
Los más cinéfilos van sentise estrelles auténtiques del sétimu arte pasiando pela alfombra colorada del Festival Internacional de Cine de Xixón -que va celebrase del 15 al 23 de payares-, gracies al photocall face in hole y a l’alfombra que van asitiase nel hall de los cines Kinépolis -Ciudad de la Imagen. Xixón Turismu y el Grupo Logitravel van poner el ramu a toes estes actividades con una montonera de sorpreses y premios y col sortéu d’un viaxe a Xixón.