El portavoz de Vox diz que «nun va participar nos debates que se faigan n'asturianu»
01 jul 2020 . Actualizado a las 16:58 h.La Xunta Xeneral del Principáu aprobó esti miércoles, por 27 votos a favor, 13 en contra y 5 astenciones, la reforma del Reglamentu de la Cámara pa garantizar el derechu a usar l'asturianu nel parllamentu autonómicu.
Los diputaos del Grupu Socialista, de Podemos, d'IX y de Foru apoyaron el dictame de la Comisión de Reglamentu, nel que s'indica que, na práctica parllamentaria desenvuelta hasta la presente Llexislatura, non namás los diputaos facíen usu de la posibilidá d'usar l'asturianu, sinón que tamién lo fixeron miembros del Conseyu de Gobiernu, otros altos cargos, empleaos públicos y comparecientes polo xeneral.
«Énte les dificultaes qu'al empiezu de la presente Llexislatura planteó esti usu parllamentariu, faise necesario clarificalu y formalizalu reglamentariamente por razones de seguridá xurídica», indícase, faciendo mención al artículu 4 del Estatutu d'Autonomía y de la Llei del Principáu d'Asturies 1/1998, de 23 de marzu, d'usu y promoción del asturianu, y al compromisu claru y inequívocu de la Xunta Xeneral col usu, promoción y protección del asturianu.
D'esta manera, derógase l'artículu 11 del Reglamentu de la Xunta Xeneral, que facía namás mención a que los diputaos podíen utilizar el bable nel exerciciu de les sos funciones parllamentaries, y añádese al Reglamentu de la Xunta Xeneral un artículu nuevu 3 bis que diz: «Nel marcu de lo dispuesto pol Estatutu d'Autonomía y, nel so casu, pola llexislación que lo desenvuelva, tanto los Diputaos nel exerciciu de les sos funciones parllamentaries como los miembros del Conseyu de Gobiernu, los cargos y empleaos públicos y cualquier persona que compareza énte la Cámara van poder utilizar el bable asturianu».
Coles mesmes, esplicítase que «la Mesa de la Cámara, oyida la Xunta de Portavoces, va adoptar, nel so casu, los criterios afayadizos pa tal efectu».
La reforma defendióla la portavoz d'IX, Ángela Vallina, pa la que ye esencial protexer la llingua asturiana «como manda l'Estatutu d'Autonomía», amparando'l so usu nel parllamentu asturianu como se venía faciendo dende hai décades hasta'l refugu de delles formaciones nel últimu añu. «El desconocimientu de la llingua yera namás la sida pa torgar el so usu», sostienen dende IX pa xustificar la reforma del Reglamentu.
Nel mesmu sentíu, Adrián Pumares (Foru) remarcó que l'asturianu «entiéndese» polo que, cree, el refugu al so usu na Xunta por delles formaciones nun se debe a «un problema de comprensión sinón de tolerancia». «Parez que cafia que s'utilice l'asturianu na Xunta Xeneral», dixo, apostando pol derechu a «nun tolerar la intolerancia».
Tamién favorable a la reforma mostróse la portavoz socialista, Dolores Carcedo, que calificó de «insólito y llamentable» que trés grupos --PP, Ciudadanos y Vox-- torgaren a la conseyera de Cultura, Berta Piñán, esponer n'asturianu'l so programa de gobiernu. Asina, recordó que'l PP y Ciudadanos nun plantearon en llexislatures anteriores problemes nel usu del asturianu, polo que-yos reprochó que se dexaren «arrastrar» por Vox. «Podrá usase como años atrás pero agora recoyíu espresamente nel Reglamentu», apuntó.
Dende Podemos, Rafael Palacios apoyó'l cambiu del Reglamentu y pidió avanzar esta llexislatura na reforma del Estatutu d'Autonomía p'algamar la oficialidá de la llingua asturiana.
Una intervención que Palacios fixo n'asturianu y qu'interrumpió'l diputáu de Vox Ignacio Blanco que se dirixió a la Mesa pa señalar que nun entendía «delles palabres». El presidente de la Xunta, Marcelino Marcos Líndez, recordó al diputáu de Podemos que podría usar l'asturianu y traducilu al castellanu dientro del tiempu establecíu al empar que pidió sensatez al parllamentariu de Vox.
Ignacio Blanco mostró'l so refugu a la reforma porque sostién que «nun val pa nada» al considerar que «yá se pue falar n'asturianu» na Xunta Xeneral pero lo que nun ta «amparáu» ye «el derechu de los que nun lu entienden» nin tienen «intención d'aprendelu». Nesi sentíu, adelantó que'l so grupu «nun va participar nos debates que se faigan n'asturianu».
Per otru llau, el diputáu de Ciudadanos Armando Fernández Bartolomé incidió que la reforma nun resuelve la situación; de la que'l diputáu del PP Pablo Álvarez Pire señaló que nun ye una «solución afayadiza» y alertó del riesgu de xudicializar l'actividá parllamentaria por «formaciones que busquen el titular», polo que propón trabayar pol consensu y diálogu que demanden los ciudadanos; informó Europa Press.
