Definir la realidá ye mui difícil porque les nuestres neurones reciben señales llétriques que’l cerebru tien qu’interpretar. Esi procesu nun ye igual pa tol mundu, depende de la cantidá d'interacciones, directes o indirectes col mundu exterior. ¿Escuenderase la verdadera realidá na oriella del subconsciente, onde s’esvanez el so sentíu tráxicu? ¡Quién sabe! Lo que paez claro ye qu’atrevese a enfrentase a los grandes desafíos de la realidá de la nuestra vida con coraxe, determín y humor, ye difícil porque tendríemos qu’interpretar cada desafíu, cada momentu adversu, como si fuere una oportunidá de cambiu positivu. Asina lo ficieron el centenar de persones que viven nun pueblín austriacu llamáu Fucking del que nun se sabe a ciencia cierta l’orixe etimolóxicu del nome, anque ta documentáu dende 1070. Ello ye que los turistes de tol mundu solíen viaxar hasta Fucking, asitiáu a unos 40 kilómetros al norte de la histórica ciudá de Salzburgu, pa facer chancia del nome, que n'inglés significa «xingar». A los fuckinger, fartos del bullying, amás del robu de les señales a lo llargo d’años, prendióse-yos les señales llétriques como si fueren una bombiella, al estilu de Thomas Edison; que por cierto tenía medrana a la escuridá, asina que ficieron una interpretación pa resolver el gran desafíu: en xineru el pueblu va llamase Fugging. A la fin «It’s Fucking over!».
Espero que la xente d’esi pueblu de nome tan célebre tenga cuidáu cuando faiga’l símbolu ganador de «victoria» porque ensin dir más lloñe, o diendo mui lloñe, en países como Australia y Nueva Zelanda, anque tamién nel Reinu Xuníu ya Irlanda, simboliza ún de los xestos insultantes más populares de comunicación non verbal, como n’España ya otros países cuando s’enseña’l dedón. Sicasí, hai que camudar la orientación de la palma de la mano y enfocala escontra la cara. L’orixe nun ta claru. Dicen que na batalla d’Agincourt, na Guerra de los Cien Años qu’enfrentó a Inglaterra y Francia, los franceses esperaben cortar los deos a los arqueros ingleses capturaos pa que nun pudieren batallar. Tres la derrota francesa, facíen chancia alzando les manes colos dos deos llevantaos y la palma de la mano hacia dentro pa enseña-yos les manes intactes. En Roma la peineta yera'l xestu obscenu que Calígula facía cuando daba la so mano al tribunu Casio Querea, con fama d'amuyeráu, col fin d’humildalu. Nel so orixe utilizábase p’alloñar el malgüeyu. Imitábase'l xestu del muérganu sexual masculín, al que se-y atribuyía poder p’acabar coles maldiciones, polo que los amuletos en forma de falu yeren de lo más frecuente. Seya como seya, los vecinos de Fucking, que van ser en xineru de Fugging, pasarán del infiernu al cielo darréu. Como cada pueblu interpreta les señales llétriques a la so manera, si saquen el dedón, pue ser tanto pol bullying padecíu, como pol xúbilu pol cambiu del nome.
El casu ye que la vida pue sorprendenos y camudar del infiernu al cielu, y del cielu al infiernu, en segundos. Y falando de la xente de Fucking, tampoco sabemos si los protagonistes de les noticies que voi cuntavos, que son verdaderes dafechu, sacaron o non el dedón. Ello ye qu’una muyer de la India denuncia al so estrenáu home porque llevaba peluca cuando se conocieron y enxamás-y lo dixo. La muyer afirmó que s'enteró de que yera calvu la nueche de bodes cuando la so pareya esnudó’l so cuerpu y l’alma. Por esi momentu de debilidá, l’home ta a la espera de ser citáu nel xulgáu pa defendese de l’acusación de fraude pal llogru de la dote. Meyor suerte tuvo un médicu brasileru al que’l so noviu lu dexó énte l’altar, polo que nin curtiu nin perezosu decidió casase consigo mesmu nuna ceremonia onde invitó a tola familia. ¿Ónde diba atopar dalguien meyor pa casase? Anque pensándolo bien, si t’alcuentres solu y deprimíu la meyor solución ye remedar a la bloguera y YouTuber Simone Partner, una moza que vivió nuna granxa de gochos en Bath y namoróse de la idea de tener el so propiu gochu mascota. Asina que’l día que mercó una casa, decidió facer realidá el so deséu: mercar tamién el gochu más guapu del mundu que llamó Milio, al que-y da una dieta especial y un carráu de mimos a toles hores.
Charles Chaplín dicía que la vida ye una obra de teatru ensin ensayos na qu’hai que cantar, rir, baillar, llorar… Bueno, nun quiero contradicilu, pero lloremos lo necesario y puntu. Vivamos con intensidá tolos momentos de la vida, nun perdamos tiempu entrugándonos si lo que facemos tien dalguna esplicación lóxica, o non, porque a lo cabero cuando’l telón baxe, nun habrá aplausos, o sí. ¿Pa que camudar énte los desafíos del coronavirus? ¡Allegría, alcuentros y turrón! El problema ye que podríemos pasar del cielu al infiernu en segundos, pero en Navidá val más ser como les estrelles de mar que, como nun tienen cerebru, nun son a interpretar les señales llétriques. Enfrentémonos a los grandes desafíos de la vida con coraxe, determín y humor cuando acaben les fiestes. En xineru, na oriella del subconsciente, atoparemos los suaños más increyibles, dalgunos tráxicos, mentanto el gochín Milio, muertu risa, aplaudirá a rabiar les disparataes formes de vivir de los humanos pensando que namás ye teatru.