El Conceyu pon en marcha los Episodios Gastronómicos, cuatro rutes qu'axunten cultura ya historia
29 sep 2021 . Actualizado a las 05:00 h.El Conceyu de Mieres, al traviés de les conceyalíes de Cultura y Turismu que dirixe Juan Ponte, pon en marcha esti mes d'ochobre los Episodios Gastronómicos del conceyu de Mieres, una serie de rutes per distintos puntos y zones del conceyu nos que s'axunta cultura, historia y gastronomía dando la posibilidá de percorrer el conceyu parando a tastiar productos y platos en puntos bien simbólicos y emblemáticos del conceyu.
Unos Episodios Gastronómicos qu'entamen esti sábadu 2 d'ochobre col episodiu de Mieres y que van rematar el 23 d'ochobre col Valle de Turón, pasando'l día 9 per Baíña y Uxo y el 16 per Cuna y Cenera. Aventures gastronómiques enmarcaes dientro de les rutes temátiques qu'estes conceyalíes entamaron tol branu col oxetivu de promocionar y dar a conocer el patrimoniu del conceyu.
Unes rutes que llograron un gran ésitu y que rematen con estes cites colo meyor de la nuesa gastronomía, dando protagonismu al legáu de les guisanderes, los embutíos de Turón, el chocolate d'Uxo o la casadiella del Valle de Cuna, por poner solo dellos exemplos de lo que les y los participantes van atopar nestes cites pa descubrir y redescubrir el conceyu al traviés de los sos sabores más característicos.
Les reserves pa estos Episodios Gastronómicos, con aforu llendáu, tienen que facese na Oficina Municipal de Turismu o nel teléfonu 985 45 05 33. Toles rutes cuesten 15 euros, empiecen a les 12 hores y el calendariu ye'l siguiente:
Primer Episodiu: Mieres. Sábadu 2 d'ochobre. Puntu d'Alcuentru: IES Bernaldo de Quirós
Esta ruta pretende poner sobre la mesa una serie d'acontecimientos históricos que tuvieron llugar nel conceyu y que tienen rellación directa cola gastronomía. A lo llargo del percorríu van facese distintes paraes pa reponer fuerces y conocer un poco meyor esos oríxenes. Va ser un paséu de la mano de Lorca, Armando Palacio Valdés, Madalena y Víctor Alperi, Carmen Fernández de Rivera, María Luisa García… regáu con platos emblemáticos de la historia gastronómica de la villa.
Segundu Episodiu: Baíña y Uxo. Sábadu 9 d'ochobre. Puntu d'Alcuentru: Conceyu de Mieres
El percorríu va empezar na zona noroeste del conceyu, con fabes, chorizu y la bebida patria. Yá n'Uxo va repasase la flamante historia chocolatera de la contorna, pa rematar con un alcuentru col patrimoniu y la historia del conceyu, too ello interpretao en clave cultural y gastronómica.
Tercer Episodiu: Cuna y Cenera. Sábadu 16 d'ochobre. Puntu d'Alcuentru: Conceyu de Mieres.
Escursión en forma de ritual con presencia de sidra, tortos y ragú de xata. Un percorríu per espacios singulares, unos enllenos d'historia y otros rebosantes d'hestories que se van prebar en pequeños mordiscos.
Cuartu Episodiu: Valle de Turón. Sábadu 23 d'ochobre. Puntu d'Alcuentru: Conceyu de Mieres
Esta ruta adiéntrase no más fondo del Valle de Turón, santu y seña de la minería, de los embutíos, del pote asturianu, d'empanaes y tarta turonesa. María Luisa García y Emilia Fernández van guianoa al traviés de les sos especialidaes pela historia recién de la cultura gastronómica, rematando col quesu d'Urbiés, en plenu procesu de recuperación.