Borrar a les muyeres de les cais d'Uviéu

AGORA

ELOY ALONSO

17 nov 2021 . Actualizado a las 08:32 h.

Ayer en Lluanco sentí a un home que taba al mio llau nuna cafetería que ?en realidá sentímoslu toles persones porque falaba al alto la lleva? «por culpa del gobiernu, la muyer agora tien más derechos que los homes, dióse la vuelta a la tortiella». Según un informe del Bancu Mundial (Muyer, empresa y el derechu de 2020) nel que s’analizaron 190 economíes faciendo un siguimientu de cómo les lleis afecten a la muyer en distintes etapes de la so vida, la brecha ente muyeres y homes foi zarrando más y más. De toles maneres, les muyeres tienen entá güei namás el 75 per cientu de los derechos en rellación colos homes (en 1970 yera la metá); sicasí, entá la diferencia ente dambos xéneros sigue. Asina que ye mui improbable, y nada deseable, que dalgún día les muyeres tengan más derechos que los homes. Basta alcordase de que namás el 10% de muyeres ocupen el cargu de presidentes o xefes de gobiernu nel mundu enteru. De lo que nun hai duldes ye que depués d’una catástrofe les persones más vulnerables son les que sufren más les consecuencies. Por mor de l’andancia Covid los centros educativos zarraron como midida preventiva, lo que provocó que les muyeres mayoritariamente volvieren a les sos cases, dexando’l so trabayu, o entamaren a teletrabayar pa facese cargu de los menores, dalgo qu’afectó al so progresu profesional. Amás, nel casu de víctimes de violencia de xéneru, la vuelta a casa supunxo la convivencia continua col so maltratador y col mieu. Según el Fondu de Población de les Naciones Xuníes, en periodos de confinamientu la media mundial de violencia de xéneru aumenta un 20%. Esta cifra podría traducise en que, nos seis meses de confinamientu vivíos en dellos llugares del mundu, hebo 31 millones de casos más de violencia de xéneru. Europa nun se llibró d’esta llácara. Según la OMS, les llamaes por violencia doméstica na andancia fueron un 60% más en comparanza a cualesquier otru añu,

Ye necesario destacar que nos medios de comunicación ye frecuente atopar frases como: «Afirma que nun ye machista nin feminista, sinón que busca l’equilibriu». El casu ye que según el Diccionario de la rae, «feminismu» ye’l «principiu d’igualdá de derechos de la muyer y l’home» y el «movimientu que llucha pola realización efeutiva» d’esa igualdá. Pela so parte, define «machismu» como «actitú de prepotencia de los varones en rellación a les muyeres» y «forma de sexismu caracterizada pola prevalencia del varón». Darréu d’ello nun se trata de dos términos equiparables: mientres que’l feminismu busca la igualdá ente sexos, el machismu supón una preponderancia del varón. Na actualidá, depués de la llucha incansable de les muyeres de magar los años 70 del pasáu sieglu pa llograr la igualdá, apaez nel panorama políticu español un partíu d’ultraderecha que diz que «nun fai falta una política específica pa les muyeres nin que l’Estáu-yos dea una protección especial», y lo malo ye que ye demasiao frecuente que los partíos de dereches los sigan. Por esti motivu, nun sorprende que la formación de Santiago Abascal propunxere’l desaniciu de dellos apartaos del artículu 172 del Códigu Penal p’acabar colo que llamen «la criminalización del home operada pola llexislación de xéneru». Un despropósitu dafechu.

Una encuesta de YouGov en 2018 amosó que namás el 34% de les muyeres en Reinu Xuníu respondieron «sí» cuando se-yos preguntó si yeren feministes, cuatro puntos más qu’en 2013. Ye más o menos lo qu’asocede nel restu d’Europa: menos de la metá de los homes y muyeres encuestaos en cinco países tán d’alcuerdu en que son feministes, anque les diferencies ente países son bultables. Sicasí, les persones nun paecen refugar el términu feminismu porque tean en contra de la igualdá de xéneru o porque crean que se llogró. El mesmu estudiu reveló que 8 de cada 10 persones camentaba que los homes y les muyeres tienen de ser trataos d’igual manera en tolos aspeutos, y munchos taben d’alcuerdu en que’l sexismu sigue siendo un problema. Esti estudiu, qu’algamó a 27.000 persones n’EE.XX., reveló que dos tercios creíen na igualdá de xéneru en 2016, en comparanza con un cuartu que lo faía en 1977. Nuna encuesta esclusiva de YouGov pal HuffPost con motivu del 8-M pasáu dizse qu’al 82% d’españoles paez-yos que’l machismu sigue siendo un problema. El sondéu amuesa tamién qu’esiste inda una fuerte resistencia al términu feminista: el 48% declárase asina, frente al 43% que refuga ese nome. Asina que dellos estereotipos y conceutos enquivocaos asociaos col feminismu siguen vivos; na década de 1920, a les feministes solíen estigmatizales con tou tipu d’esterotipos y falsedaes.  Un sieglu depués, partíos ultraconservadores como Vox nun queden atrás. El pasáu 8-M, les cares de muyeres tan célebres como Rosa Parks o Frida Kahlo del mural feminista de Ciudad Lineal de Madrid, amanecieron cubiertes de pintura negro: queríen borrar el so rostru y la so presencia. Lo malo ye que poco depués Vox casi llogró que se borrara dafechu’l mural feminista afitándose nel so «mensaxe políticu»: nuna proposición que cuntó col sofitu de PP y C’s proponíen sustituyir estes pintures por otres que representaren a deportistes paralímpicos, pero énte les movilizaciones y protestes C’s camudó de postura. Nel mesmu sen, n’Uviéu la decisión del PP y C’s va unos díes provocó que Somos y PSOE protestaren pol cambéu de nomes de cais con nomes de muyeres por nomes d’homes. Pa la catedrática de la Universidá d’Uviéu Isabel Carrera, «nun tien sentíu que se decidiere quitar a toles muyeres, hai un mensaxe políticu, social y educativu tarrecible».