Les cartes, paquetes y notificaciones que se manden dende les oficines postales van incluyir nes direcciones la nomenclatura tradicional
10 nov 2022 . Actualizado a las 14:01 h.El senador de Compromis, Carles Mulet, calificó de «triste y llamentable» que fora'l partíu valencianu'l que reclamara a Correos y al Gobiernu central l'usu de la toponimia oficial asturiana na empresa estatal.
Correos principió a usar la toponimia tradicional asturiana que yá ye oficial nes sos aplicaciones internes y, nun apunte en twitter, el senador Carles Mulet calificó de «triste y llamentable» qu'esto sía posible gracies a la «insistencia» de Compromis énte Correos y el Gobiernu central.
«Hasta que nun nos punximos, nun s'algamó. Vergoña de PP y PSOE», afirmó Mulet, senador que rexistrara delles entrugues al Gobiernu del Estáu pa qu'esplicara les midíes que diba adoptar pa que Correos respetara les denominaciones oficiales na etiqueta que s'emite cola dirección y el númberu de l'unvíu.
Dende Correos, nuna respuesta per escrito, indicaron al senador que la empresa respetaba'l patrimoniu llingüísticu español y señalaron que, anque'l procesu d'oficialización nun acabara, diben trabayar pa implementar les «midíes internes necesaries» p'asegurar «la normalización del usu en Correos de los nomes de llugar asturianos aprobaos oficialmente en cuanto sía posible».
Correos anunció esti xueves que va empezar a usar nos sos sistemes la toponimia asturiana. Asina, les cartes, paquetes y notificaciones que se manden dende les oficines postales van incluyir nes direcciones la nomenclatura tradicional.
Asina lo ratificaron en Madrid la directora de Rellaciones Institucionales de Correos, Leire Díez Castro, nuna xunta caltenida cola conseyera de Cultura, Política Llingüística y Turismu, Berta Piñán, y el director xeneral de Política Llingüística, Antón García Fernández.
La empresa espera acabar el procesu nel primer trimestre del 2023. Va ser el momentu nel que l'INE incluya topónimos como 'Uviéu', que tovía nun tán incluyíos nel nomenclátor oficial del Estáu.
«Cola implementación nueva de los sistemes de les oficines, Correos avala l'usu y promoción de la nomenclatura tradicional, una de les reivindicaciones históriques del asturianismu cultural y llingüísticu», indicaron dende Correos.
La directora de Rellaciones Institucionales de Correos, Leire Díez, espresó'l compromisu de Correos colos asturianos, «tanto cola promoción de la cultura y tradición asturiana, como cola garantía nel accesu a los servicios básicos a tolos vecinos y vecines, independientemente d'onde vivan»; informó Europa Press.