El Conceyu de Mieres consigue 800.000 euros pa iniciatives que se centren nel usu de la tecnoloxía na recuperación de patrimoniu, la gastronomía o la movilidá sostenible
12 may 2023 . Actualizado a las 09:21 h.El Conceyu de Mieres consiguió lluz verde pa los seis proyectos que presentó dientro del Plan de Sostenibilidá Turística del Monte Central. En total 800.000 euros d'inversión que son frutu del trabayu y la planificación fecha dende'l Gobiernu llocal, en concretu dende la conceyalía de Turismu que dirixe Juan Ponte, pal desenvolvimientu d'un proyectu global que dexe impulsar acciones singulares aprovechando los recursos y el patrimoniu del conceyu. «Cola aprobación d'estos proyectu faise xusticia», consideró'l conceyal, que recordó que'l Monte Central quedó fuera d'estes partíes na anterior convocatoria de forma inxustificada retrasando inversiones importantes.
Sicasí, esta aprobación supón un respaldu al trabayu bien fechu y da lluz verde a proyectos que, nel casu de Mieres, «céntrense nel usu de les nueves tecnoloxíes nel desenvolvimientu turísticu, la recuperación de patrimoniu, la gastronomía y l'anovación y la movilidá sostenible», apuntó'l conceyal, que recordó que Mieres lleva años faciendo realidá idees ya iniciatives singulares nestos ámbitos.
En concretu, los proyectos aprobaos para Mieres, los seis que'l Conceyu presentó, son los siguientes:
1. Recreación de la vida y actividá minera per de aciu gafes virtuales nel Pozu Santa Bárbara. Esperimentar al traviés de la recreación virtual acciones como baxar a la mina, recoyer un martiellu hidráulicu, picar carbón, abarrenar, xubir a un castillete, montar en vagoneta…
2. Usu de la realidá aumentada pa conocer la historia de les instalaciones del Pozu Santa Bárbara dende la subplanta del pozu. Esti proyectu ta amestáu a la recuperación de la subplanta pa la so apertura, una actuación que se va desenvolver desque'l Conceyu llograra financiamientu del IPCE pa esti fin.
3. Percorríu interactivu pel conceyu de Mieres. Desenvolvimientu de marcadores al traviés de códigos QR que dexen conocer la historia del patrimoniu y los llugares emblemáticos del conceyu de forma accesible aprovechando les nueves tecnoloxíes.
4. Fotometría 3D pal patrimoniu artísticu, industrial y cultural del conceyu. Amestáu al proyectu anterior van realizase semeyes en 360º al patrimoniu del conceyu creando un archivu que dexe contar con material de tol patrimoniu pal so usu promocional, espositivu, didácticu…
5. Fomentu del usu de la bicicleta nel conceyu n'ares d'una movilidá más sostenible al traviés de proyectos que dexen tamién l'aprovechamientu d'esti recursu como elementu de desenvolvimientu turísticu y de promoción del conceyu.
6. Creación d'un espaciu d'I+D+i amestáu a la gastronomía nel antiguu economatu del Pozu Santa Bárbara. Tratando de crear un espaciu esperimental que dexe siguir avanzando n'esperiencies como Bocamina que se convirtió nuna referencia a nivel gastronómicu, turísticu y patrimonial.