Sumar reclama a ADIF l'usu de la toponimia asturiana na señalética, cartelería y avisos por megafonía
AGORA
El diputáu nel Congresu, Rafael Cofiño pidió «respetu» pa que les persones que visiten Asturies «llean, vean y escuchen la llingua asturiana»
25 nov 2023 . Actualizado a las 12:52 h.Sumar reclamó al traviés d'un escritu a Adif y al Ministeriu de Tresportes l'usu de la toponimia oficial asturiana en tola señalética, cartelería, avisos por megafonía y comunicaciones al públicu del conxuntu de la rede ferroviaria.
El diputáu nel Congresu de Sumar por Asturies, Rafael Cofiño, pidió «respetu pola toponimia tradicional y oficial» pa que les persones que visiten Asturies «llean, vean y escuchen la llingua asturiana».
Cofiño posicionóse asina depués de que la Xunta pola Defensa de la Llingua Asturiana (XDLA) denunciara que, polos cambios que xenera la llegada de la velocidá alta, moficaren la cartelería de la estación de La Pola (L.lena). Los indicadores nuevos nun recueyen esta forma, la única oficial dende 2005 y la que taba nos lletreros de la estación, y pasaron a reflexar el topónimu antiguu de «Pola de Lena».
El presidente del Principáu, el socialista Adrián Barbón, esplicó que l'Executivu autonómicu yá se punxo en contactu con Adif «pa esixir que respeten la toponimia oficial d'Asturies». Con too, dende Sumar insistieron en reclamar repetu pa la toponimia oficial y recordaron que la llegada de la velocidá alta, amás de les oportunidaes económiques y en comunicación, tamién supón una oportunidá pa poder visibilizar la existencia del asturianu. Informa Europa Press