Una de les idees fixes que tien l’actual gobiernu d’Asturies y que yá s’entamó a cocer a fueu lento n’anterior llexislatura, ye l’apueste ininterrumpíu pol sector turísticu. Con ello, añu tres añu tan superándose les cifres de visitantes a esti vieyu país. Y, cierto ye que nun son sólo númberos. Esa medría de turistes pue palpase tanto nes cais de les villes y ciudaes como nos requexos de montaña y costa de tola xeografía asturiano.
Pa introducir y facer más visual esta humilde opinión y primero d’apurrir unes conclusiones, vamos poner l’atención nos siguientes datos del SADEI.
En 2021, Asturies recibe, según datos oficiales, 1.587.466 viaxeros. Nel 2022 la cifra medra hasta los 2.086.549 y, nel 2023 tocamos el techu de los 2.484.410 visitantes. Porcentualmente, ente 2021 y 2023, la medría foi del 56%.
Per otru lláu, si ponemos el focu nel númberu de pernoctes, los datos amuésennos que nel lloñanu y postpandémicu 2021 hebo 4.014.201. Un añu depués, algámense los casi cinco millones (4.949.346) y, finalmente, nel 2023 yá tenemos rexistraes 5.542.261 nueches baxo’l cielu d’esti pequeñu país. Una medría, en tres años, del 38%.
Y l’asuntu, ¿cómo ta diendo nel añu 2024? Si comparamos los meses de xineru, febreru y marzu del 2023 col actual 2024, los datos dícennos que nesi curtiu espaciu temporal la medría ye del 25% nel númberu de viaxeros y del 32% no que se refier a les pernoctes. Poro, nun va ser nada difícil qu’esti añu nos averemos o incluso pasemos de los seis millones de nueches y los tres millones de visitantes. Nun ta nada mal, ¿non?
Con datos asina ye comprensible atopar gayoleru al Gobiernu. Anque realmente nun ye oru tolo que relluma tocante al turismu. Por exemplu, equí tenemos yá los problemes d’accesu a la vivienda digno que siempres van de la mano del espoxigue del turismu y que, hasta va poco, paecíen cuestiones ayenes a esta tierra. Emancipase ye güei más difícil que tres del boom turísticu. Apostar por esi seutor ensin un plan de vivienda paralelu, fainos, ensin dulda, más probes. (Garre la primer nota, Gobiernu).
Otru tema ye, tamién, la terciarización de la sociedá. El porcentaxe de trabayadores del seutor industrial mengua en comparanza col que representa, cada vegada más, el seutor servicios. Eso, a curtiu plazu, nun tien por qué facenos más probes, pero lo que sí que nos fai, de xuru, ye más precarios. Sobre manera a mediu y llargu plazu. Porque ensin un seutor industrial fuerte y modernu, estratéxicu pal gobiernu, encontáu na investigación, el desarrollu, la innovación y la ciencia, Asturies y la xente que nella vive, va ser, económica y socialmente, bastante más vulnerable y dependiente. (Segunda nota).
Y, la tercer. Hai turismos y turismos. Per un llau alcontramos el modelu que medra de forma llibre, ensin control, col envís de superar cifres a cualesquier preciu y arriqueciendo a los de siempres. Pero, per otru, esiste tamién el modelu que se dirixe y se tutela responsablemente (anque pueda resultar daqué difícil el poder harmonizalo). Pero, ¿por qué habría que lo dirixir? La rempuesta ye evidente: porque nun hai turismu sostenible. Viaxar, tal como se fai anguaño, xenera sí o sí, un impactu que, cómo non, asume y paga l’alministración, ye dicir, la xente que vive y trabaya nesi territoriu: multiplicación de residuos que se tienen que xestionar, consumu d’agua n’escesu, impactu nes víes de comunicación rodaes y d’a pie, ocupación d’espacios, contaminación, necesidá de mayores servicios de movilidá, seguridá y llimpieza, aumentu del ruíu, etc. Poro, ¿nun ye llóxico y xusto plantegar que’l turismu, en sí mesmo, tenga un impuestu? Y refiérome a «impuestu» y non a «ecotasa» porque los impuestos, si se distribuyen de forma xusta según aquello de «quien más tien y xenera, más ha d’aportar», nun habría que los intentar camuflar de mou ecofriendly. Hai que los desplicar con pedagoxía y, depués, con valentía, aplicar. D’otra banda, apostar por esa midida tampoco sería daqué nuevo; yá s’aplica en más de 130 ciudaes d’Europa y en dos comunidaes autónomes españoles.
Y, por si hubiere duldes, ¿quién ye’l que lu pagaría? El consumidor final. Ye dicir, el que viaxa. Nesi sen, anímome a plantegar la siguiente entruga: ¿Daquién cree qu’una familia que quiera conocer Asturies diba dexar de venir por tener que pagar, por exemplu, una tasa adicional d’un euru por nueche? El tan promocionáu, verde y exóticu «paraísu», ¿nun val nin siquiera esi euru al día?
Pa espeyar lo que podría suponer esto, vamos intentar poner un cenciellu casu prácticu. Si nel 2023 cada pernocta llevare asociada una tasa de 1,5 €, el gobiernu d’Asturies podría tener recaldaos 8.313.391 €.
Dempués, enriba d’esa ecuación, sedría l’alministración la que-y habría dar forma y personalidá, con midíes como fomentar el turismu familiar descontándo yos la tasa a los menores de 18 años, abaratando tamién el so costu nos meses de temporada baxo por aquello de desestacionalizar, etc.
Pa dir finando y, tres les notes, una propuesta.
Cola recaldación, ¿qué podemos facer? ¿Inviértese directa y exclusivamente nel propiu turismu? Si seguimos l’argumentariu d’esta reflexón, pienso que diba ser poco efectivo. En cambiu, cola propuesta que vamos esponer darréu, sí que se vería beneficiáu el seutor de forma indirecta (anque d’un mou peculiar). Nesi sen, la recaldación anual habría destinase de forma íntegro al seutor de la Cultura y el Deporte que se crea n’Asturies. Algunos de los beneficiarios sedríen la música, el teatru, el cine, la danza, les artes escéniques y plástiques, los deportes tradicionales xunto colos minoritarios como’l hockey o’l balonmano. Con una apuesta d’esti calter, el gobiernu diba tar utilizando’l turismu pa potenciar y profesionalizar, de forma direuta, el seutor de les industries culturales y creatives asturianes, asina como los deportes que tienen base nel nuestru territoriu. Amás d’ello, y indireutamente, taría beneficiándose el seutor turísticu gracies a esi públicu que se diba mover en direición a Asturies a la gueta del esfrute de la cultura, les artes y el deporte.
Parafrasiando al presidente, pienso: ¿Nun diba ser esta una midida coherente pa cola fueya de ruta d’un gobiernu d’unidá progresista y con vocación reformista?