Ismael González Arias gana'l 45 Premiu Xosefa Xovellanos de novela n'asturianu cola obra «1664/1665»
AGORA
El xuráu destaca «el trabayu de documentación, la solidez y la estructura narrativa trabayada d'esti thriller históricu ambientáu en dómina barroca y protagonizáu por personaxes femeninos»
12 sep 2024 . Actualizado a las 13:39 h.Ismael María González Arias fíxose col Premiu Xosefa Xovellanos de Novela n’asturianu que convoca la Conseyería de Cultura, Política Llingüística y Deporte cola obra 1664/1665. El xuráu destacó «el trabayu de documentación, la solidez y la estructura narrativa trabayada» de la obra, que garra la forma de thriller históricu y que protagonicen personaxes femeninos. Esti gallardón autonómicu tien una dotación de 6.000 euros, un troféu y la publicación de la obra ganadora.
El xuráu d’esta 45 edición del premiu presidiólu’l director xeneral d’Acción Cultural y Normalización Llingüística, Antón García, y integráronlu cinco espertos en lliteratura asturiana: Héctor Pérez Iglesias, Marta López Fernández, Liliana Díaz Gómez, María Cueto Fernández y Gonzalo Llamedo Pandiella.
Ismael María González Arias (Mieres del Camín, 1958) ye escritor y productor musical, y foi bien de tiempu’l director de la Casa la Cultura Teodoro Cuesta de Mieres del Camín. Ente la so producción lliteraria pueden nomase les obres coles que ganó los premios Máximo Fuertes Acevedo d’Ensayu (L’Asturianada, 1998), María Josefa Canellada de Lliteratura Infantil y Xuvenil (Les puertes del paraísu, 2009) o’l propiu Xosefa Xovellanos, que ya llogró otres dos veces (El cuartu negociu, 1992; En busca de Xovellanos, 2005). Nel 2009 llevó también el Premiu de la Crítica d’Asturies.