Falamos cola socióloga y autora gallega, qu'anguaño esfruta d'una estancia na Residencia Lliteraria Xixón
15 may 2025 . Actualizado a las 12:59 h.Miriam Couceiro Castro visita Asturies esti mes de mayu pa esfrutar d’una estancia col oxetivu d’avanzar col so últimu proyectu, una propuesta que sal de lo puramente lliterario p’afondar n’otres de les sos pasiones y esmoliciones vitales. Lo cotidiano ye’l material conceptual d’una autora qu’amiesta poesía, prosa y ensayu, que piensa y fala dende la socioloxía y el feminismu, buscando siempres una comunicación práctica perriba del orniamientu innecesariu p’averar la teoría al públicu menos avezáu.
Ente les sos obres y reconocimientos, destaquen l’ensayu A Galiza Feminista: Tebras e Alboradas (2021), nel que l’autora ufre un rellatu alrodiu del movimientu feminista en Galicia, emplegando un llinguaxe cercanu y un tonu divulgativu; y la novela De óxido e diamantes (2024), na que se narren les peripecies d’una relación tóxica, una hestoria de pantasmes y tormentes, de lo ferruñoso qu’asoma pelos resquicios del brillu que mos eslluma de primeres.
Falamos con Miriam sobre’l so procesu creativu, sobre la rellación ente pensamientu y acción, ensin escaecer la so postura como feminista. Tamién nos ufre l’autora un avance sobre’l proyectu lliterariu que tá desendolcando mientres la so estancia na Residencia Lliteraria Xixón. Equí, la entrevista:
Como escritora yá tienes demostrao que toques distintos xéneros, anque siempres xirando alrodiu de les tos esmoliciones vitales. Ye evidente qu’atiendes muncho pa la lliteratura gallega, pero de xuru bebes d’otres fontes artístiques. ¿Qué papel xueguen otres disciplines como’l cine o la música nel to procesu creativu?
El cine clásicu ye fundamental nel mio procesu creativu... Escribo siempres sobre les emociones y sobre lo cotidiano y ye un tipu de cine que me dexa desenvolver enforma esa forma d'escribir al ser el cine d'antes, daqué muncho menos «impostao» y rebuscao que lo que tenemos agora en cualquier plataforma. En rellación a la música, pásame esactamente lo mesmo, escucho muncha música d'antes, con mensaxes qu'agora paecen nun entendese pero que tán ende y casi siempres vuelvo la vista al universu de cantautores, porque faen poesía musicada...
¿Y el bordáu?
El bordáu ye lo que directamente salvó tol mio procesu creativu. Nun puntu complicáu a nivel emocional daquién encamentóme «baxar a la tierra», precisaba siguir escribiendo pero tamién tar presente nel «equí y agora» y, nesi sentíu, trabayar coles manes conéctate directamente contigo mesma y col presente. Empecé a bordar nos Clubes de Bordáu de Lúa Mosquetera, la poeta y escritora y d’ellí saqué aprendizaxe, amistaes, conexón conmigo mesma y muncha creatividá qu'aplico a la escritura. Nun m'importó ser bona o mala bordando, a cencielles empecé a faelo y pensé en qu'anguaño, nun mundu nel que les redes sociales fálennos d'una supuesta perfección constante (bien falsa por cierto), facer daqué porque te gusta ensin importar esa perfección o si yes bona o mala nello yera dalgo revolucionario.
Yes socióloga de formación y defendes un feminismu que surda de la esperiencia. Esti métodu de reflexón que va de la esperiencia a la teoría ye yá un clásicu que tovía güei sigue chocando con modelos más elitistes. ¿Pue ser ésta una manera d’averar la teoría feminista a xente que quiciás la siente como dalgo alloñao o quiciás hasta amenazante?
Creo que'l feminismu, como humanismu puru que ye, tien que beber del ciñu y el respetu. Quería articular el mio activismu feminista dende esi puntu, inclusive nos momentos de desacuerdu con otres muyeres feministes, que los hai. Nun me gusta la superioridá autoatribuyida de dellos perfiles por venir de lo académico, yo tamién bebo d'eses fontes teóriques, fíxime feminista ende, na universidá, de la mano de feministes a les qu'almiro y respeto y que nos dotaron d'un aparatu conceptual básicu pero... ¿quién soi yo pa faer sentir a la mio güela o a cualquier muyer que nun conoza les fontes teóriques, les corrientes o los choques de trenes que tenemos agora mesmu, menos feminista o dici-y que nun lo ye? Bebí del feminismu académicu y de la esperiencia de vida de les mios güeles, de mio ma, inclusive de la de delles muyeres a les que-yos asusta la palabra feminismu y foi más fácil llegar a elles, desplicar y abrir puertes que taben cerraes, dende esi ciñu y respetu fondu a la so esperiencia vital.
Vienes del mundu académicu pero vese a les clares l’enfotu que pones en facer una lliteratura cercana, qu’avere problemes complexos a llectores que quiciás nun tean tan avezaes a según qué cuestiones. ¿D'ónde sal esta voluntá divulgativa qu’amueses na to obra?
Creo que si dalgo puede dicise en cinco palabres nun hai qu’utilizar seis y que si pa desplicar dalgo pues facelo d’una forma estilísticamente guapa pero ensin demasiáu orniamentu, tamién debes facelo así. Creo muncho na fermosura del mundu y nel arte como productor d’esa belleza... Veo la lliteratura como arte... Pero creo qu’hai qu’acercala a persones qu’a lo meyor nun diben parase a leer poesía, prosa poética o una novela. Como a cualquier escritora, préstame que me llean, pero emocióname enforma recibir el mensaxe de «describes esactamente dalgo que pasóme a mi» y que s’entienda y conecte cola esperiencia d’otres y otros. Escribir ye eso... buscar de contino la conexón y creo que les persones qu’escribimos tenemos esi mieu a la soledá que fai que busquemos esa conexón, nel casu míu, al traviés d’un llinguaxe claru, dalgo pulíu pero siempres claru y divulgativu... La vida trai coses dures y abrir puertes de conocimientu, salva...
Feminismu y feminismos… Esti ye un bon melón: la diversidá de corrientes, ún de los aspectos que vertebren la teoría feminista, ye al tiempu una de les sos mayores fortaleces pero tamién ún de los aspectos que más crítica recibe y qu’incluso val p’abrir espaciu a fractures internes. ¿Ye un tema que t’ocupa? ¿Cómo se reflexa esta dualidá na to obra?
Esti ye una tema vital agora mesmo. Nun creo nos feminismos, creo nel feminismu, l'oxetivu ye común: acabar con too aquello que caltién a muyeres y neñes nuna posición poco ventaxosa. A partir d'ende podemos empezar a teorizar y a faer activismu. Podemos falar d'abolición, de regulación, de muyeres trans, de vientres d'arriendu, de trata y dialogar dende consensos y «disensos» pero siempres con unes premises clares: nun pue haber teorizaciones a les que-yos falte cai nin cai a la que-y falte aparatu conceptual. Agora mesmo fáltenme diálogos y fáltame humildá. Yo mesma, dende les mios opiniones sobre temes clave pa les muyeres y neñes, tengo que tar sollerte a que soi una muyer blanca, ñacida nuna parte determinada del mundu y con ciertos privilexos y, a partir d'ende, faer un exerciciu d'humildá y ser crítica conmigo mesma y con cualquier postura elitista dientro del feminismu.
Anguaño tás esfrutando d’una estancia de cuatro selmanes na Residencia Lliteraria Xixón. Esti tipu d’esperiencies suelen presentase como una oportunidá pa aisllase y concentrase na xera lliteraria más puramente creativa, anque tamién hai un interés evidente n’aprovechar pa socializar y conocer l’ambiente cultural del llugar. ¿Cómo te plantegabes la estancia cuando echaste la solicitú?
Plantegábame’l fechu de poder escribir dende otru llugar, que ye daqué necesario. Soi una viaxera empedernida y busco escenarios lliterarios en cualquier sitiu, dende El Cairo a la cocina de la mio güela, pero tenía claro que precisaba escribir dende otru sitiu mientres un tiempu más o menos llargu. Quería probar esa parte d'aisllamientu, siquier mientres delles hores del día o de la nueche, y amestalo cola posibilidá de conocer persones d'otra ciudá, otru ambiente lliterariu; atreveme a recitar n'una llingua que nun ye la mía. La residencia ye'l llugar ideal pa eso... Tamién pa echate un pulsu como escritora.
La primer selmana de residencia tuvístela cargada d’eventos: talleres, recitales, entrevistes, presentaciones… Paez que tá siendo una estancia de les de muncha actividá. ¿Cómo la tas viviendo tu?
La primer selmana de residencia foi bien activa, encantóme. Estes selmanes tamién tienen actividaes que son importantes pa mi, n’especial nesa parte de socialización. Gústame enforma daqué que ta apurriéndome la residencia, l'amiestu de momentos sola y de socialización, porque ye'l remix perfectu p’activar la creatividá, fai qu'escriba meyor, más posada y con más idees porque permíteme somorguiame na lliteratura de forma total.
¿Podríes falanos un poco del proyectu que tás desarrollando na Residencia Lliteraria Xixón?
Toi desenvolviendo un proyectu al estilu Matrioska, esto ye, al estilu d'eses muñeques qu'abres y dientro tienen otra, y depués otra más, hasta llegar a la más pequena de toes.
Engloba fotografía bordada, poesía como llave p’abrir lo que vien depués y en cada capítulu, narrativa venceyada a lo cotidiano, a los sentimientos complicaos y al más allá... Creo que va ser lo más completo qu'escribí hasta agora y anque pue que precise más d'un mes, avanzo rápido y creo que voi dir d'equí col proyectu prácticamente termináu.
¿Dalguna recomendación de lliteratura gallega pa llectores d’Asturies que quieran averase a les vueses lletres?
Anque vos falé de volver a los clásicos, en lliteratura gallega tengo qu'encamentar agora mesmo a dos muyeres que son necesaries: Emma Pedreira en tolo qu'escribió, pero especialmente n'una obra que creo que tendría de convertise en daqué según una tesis doctoral, «As hores mortas», Emma supo identificar perbién cómo sentimos na nuesa tierra la muerte y lo que vien depués. Aparte, de Lúa Mosquetera, tamién tou, creo qu'avera la poesía a xente que nunca se plantegó parase nella y facer porque ye una autora auténtica, que fala con sinceridá, de coses que pasen a tol mundu y facer dende lo cotidiano.
Otru descubrimientu ye Xosé Iglesias, un autor que defino como home de la renacencia. Ye poeta, ye escultor, ye marineru y por esto postrero entiende perfectamente lo que ye Galicia y lo que somos...
Nun puedo dexar de falar d'un últimu descubrimientu, anque ye una autora prolífica empecé a lleela apocayá y gústame la so manera de narrar y entender la narración, dacuando dende munches voces. Nun puedo dexar de falar d'un últimu descubrimientu, anque ye una autora prolífica empecé a lleela apocayá y gústame la so manera de narrar y entender la narración, dacuando dende munches voces. Trátase de Blanca Riestra, cola so «Noire Compostela», qu’encantóme, y con «Aquí comeza o Mar».
Lo qu'encamiento a cualquier llector/a d'Asturies ye que llea en daqué distinto a llingües con munchos falantes: lleendo en gallegu o n'asturianu les palabres, la llingua y por tanto, nós como nación, nun morremos.