L'autora va tar en xunu na RLX y va participar en dellos eventos, ente ellos un diálogu cola actriz asturiana Laura Cuervo
09 jun 2025 . Actualizado a las 17:38 h.Esti mes de xunu Ale Lacour va tar d’estancia creativa na Residencia Lliteraria Xixón, desenvolviendo’l so próximu proyectu, la novela Las Mismas, una narración qu’esplora’l venceyu ente muyeres de distintes xeneraciones d'una mesmu familia, y les firíes y tensiones qu’arrastraben ente elles de manera silenciosa per décades.
Lacour va participar nun diálogu públicu cola actriz asturiana Laura Cuervo, que pasó gran parte de la so carrera en Catalunya y volvió va unos años a Asturies. Xuntes dialogarán sobre la so profesión, sobre la escritura y sobre otres intereses comunes. L’autora va participar tamién nuna sesión de taller lliterariu a lo llargo de la so estancia.
Ale Lacour (Barcelona, 1996), ye actriz, dramaturga y directora. Formada na EICTV de Cuba y na Escuela d'Escritores de Madrid, robló curtiumetraxes y obres teatrales premiaes. La so primer novela, «Todos caen», recibió'l Premio La Mistral 2025, y xunto cola so compañía La Impura, escribió y empobinó cuatro obres caracterizaes pol so enfoque provocador y llinguaxe propiu. El so primer llargumetraxe de ficción, «Sestil», foi premiáu pola RiojaFilmCommission nel 2021.
En «Las Mismas», Lacour axunta a una güela, la so fía, la so nieta adolescente y el ñácaru d’esta postrera nun hotel xunto a la mar, aisllaes por una nube. Lo que podría paecer una situación domesticada conviértese rápido nun campu de batalla emocional. Al traviés d’una narración en trés actos —L’Amor, La Muerte y La Llocura—, la novela xuega con un narrador múltiple que transita ente pensamientos y xeneraciones, preguntando si ye posible salir del bucle y romper cola herencia, cuando lo heredao somos nós mesmes.
L'autora apuesta por una prosa bien fluyida, cuasi ininterrumpida, onde les comes son l'únicu sollutu, clara influyencia de Jon Posse y les sos oraciones enllargaes. El zarru nun únicu espaciu y la tensión ente los personaxes unvien nel universu de Beckett, onde la espera, l'encierre y l'imposibilidá de comunicase son casi un personaxe más na historia.
Residencia Lliteraria Xixón
L’escritor y xestor cultural Inaciu Galán vivió nesti espaciu de Xixón a lo llargo de cuasi una década y en 2023 punxo a disposición l’apartamentu pa la creación lliteraria dende Asturies, buscando tender pontes con otres lliteratures, otres llingües, otres cultures...
La Residencia Lliteraria Xixón abrió les sos puertes a finales de 2023 y dende entós vien recibiendo a dellos escritores y traductores con proyectos de creación, dende llugares como Galicia, Arxentina, Italia, Inglaterra o’l País Vascu, ente otros.