Les 6 sindicalistes condenaes ingresen voluntariamente anque nun acaten la sentencia que les condena a 3 años y mediu de cárcel, insistiendo nel llamáu a la movilización social
11 jul 2025 . Actualizado a las 13:01 h.El Xulgáu de lo Penal nº1 de Xixón dictó una orde de detención pa les 6 imputaes por defender a una compañera embaranzada víctima d'abusu llaboral por parte de la xerencia de la Pastelería La Suiza. En resume: por facer sindicalismu. Hai yá 8 años que s'aniciare'l conflictu y pesie a les continues movilizaciones sociales que dende 2017 pidíen l'absolución de les 6, güei xueves 10 de xunetu de 2025, les sindicalistes condenaes por defender a una compañera, decidieron ingresar voluntariamente en prisión pa evitar mayores daños al so entornu. Les 6 enfréntense a una condena de 3 años y mediu de prisión por delitos de coacción continuada, nun casu amparáu pola famosa Llei Mordaza, que supón un precedente mui preocupante pa la defensa y caltenimientu de los derechos llaborales y de llibre asociación de tola ciudadanía.
El Tribunal, siguiendo la llinia d'acosu y derribu que vieno marcando tou esti casu dende l'entamu, decidió dictar autu de prisión ensin esperar pola resolución de la petición d'indultu au'apoya la mayoría social asturiana, la totalidá de los sindicatos de clase del estáu español, el Gobiernu d'Asturies y el propiu Ministeriu de Trabayu español. Tampoco quiso'l xulgáu xixonés esperar al pronunciamientu del Tribunal Européu de Derechos Humanos, qu'anguaño considera un recursu de revisión del casu presentáu pola defensa de les 6 integrantes de la CNT.
La noticia del ingresu en prisión ye l'últimu capítulu hasta la fecha d'un drama social que trai en fierros a la sociedá asturiana y al movimientu obreru español dende hai yá 8 años, pero la hestoria nun va acabar equí. El llamáu a la protesta social continúa, pidiendo agora la concesión automática del tercer gráu penitenciariu hasta que se tramite l'indultu.