Les autoridaes penitenciaries conceden el tercer grau a Les 6 de La Suiza nuna victoria parcial qu'amuesa la importancia de la movilización social y el compromisu de clas
18 jul 2025 . Actualizado a las 16:10 h.La mañana d’esti vienres 18 de xunetu dábase’l primer pasu efectivu hacia la llibertá de Les 6 de La Suiza. Una bona noticia, la primera en munchu tiempu, que responde a l’aplicación de la llegalidá vixente pero que vien motivada en grandísima midida pola movilización social masiva que se dio tanto n’Asturies como dend’l movimientu obreru y sindical de tol Estáu español. Esti vienres les autoridaes penitenciaries concedíen-yos el tercer grau, lo que supón una importante meyora na so situación práctica y un llogru de cara pa la interpretación del marcu llegal nel que s’afiten los cargos que pesen sobre elles.
El grupu de sofitu que lleva años reclamando la so llibertá considera esti pasu como un ésitu claru de la presión social qu’al traviés de movilizaciones, campañes de sensibilización y un trabayu incansable del movimientu popular, amuesa que la reivindicación sigue siendo un mecanismu efectivu de xusticia social. «Ye un pasu importante, pero insuficiente. Dende’l colectivu de sofitu reclamamos que se les exima de cualquier réxime penitenciariu. Les 6 de La Suiza nun tendríen que tar suxetes a nenguna medía restrictiva», afirmen nel comunicáu que se fixo públicu’l mesmu vienres.
Los últimos meses vióse cómo les movilizaciones, caldía más intenses y respaldaes pola xente con concentraciones, actos públicos y campañes en redes, demuestren que’l sofitu popular ye un mecanismu imprescindible pa facer frente a les inxusticies del sistema xudicial. Nesti casu trátase d’una cuestión llaboral, pero la noticia sirve p’amosar que la participación popular a pie de cai ye una ferramienta efectiva de llucha, con resultaos.
El casu de Les 6 de La Suiza ye dende fai años un iconu de resistencia, apoyu mutuu, solidaridá obrera y denuncia de la represión patronal hacia los y les trabayadores. La comunidá asturiana y los colectivos sociales de tol estáu fáense ecu con optimismu moderáu d’esta victoria parcial anque nun s’engañen, tovía queda camín que percorrer hasta llograr llibertá total de toles represaliaes.