El Festival de la Mazana de Villaviciosa declárase Fiesta d'Interés Turísticu Nacional
AGORA
Esta distinción refuerza la proyección de la cultura sidrera y consolida la villa como ún de los grandes referentes del turismu y la gastronomía d'Asturies
22 jul 2026 . Actualizado a las 13:43 h.El Festival de la Mazana de Villaviciosa declaróse ayeri Fiesta d'Interés Turísticu Nacional, una distinción concedida pol Ministeriu d'Industria y Turismu que reconoz la relevancia, la singularidá y el raigañu d'una celebración estrechamente vinculada a ún de los productos más emblemáticos d'Asturies: la mazana y la cultura sidrera.
Esta reconocencia supón un nuevu impulsu pa una cita que, dende va décades, convierte Villaviciosa nel gran escaparate de la mazana asturiana y del trabayu de los que cultiven, tresformen y caltienen vivu un productu indixebrable de la identidá d'Asturies. El festival combina tradición, gastronomía, divulgación, actividá cultural y promoción del territoriu, amás de contribuyir a atraer visitantes y a dinamizar la economía local.
«El Festival de la Mazana representa la esencia d'Asturies. Fala del nuestru paisaxe, de la nuestra cultura sidrera, de los que trabayen la tierra y d'una forma d'entender el territoriu dende'l respetu a les nuestres raíces. Esta declaración reconoz un esfuerzu colectivu y refuerza la proyección d'Asturies como un destín qu'atopa na so identidá una de les sos mayores fortaleces», aseguró Gimena Llamedo, vicepresidenta del gobiernu asturianu.
Llamedo destacó, amás, qu'esta declaración va contribuyir a aumentar la visibilidá del festival y de Villaviciosa dientro y fora de la comunidá, y va crear nueves oportunidaes pal comerciu, la hostelería, la restauración y el texíu económicu del conceyu. Con esta, Asturies suma yá once Fiestes d'Interés Turísticu Nacional, una rede de celebraciones que constitúi ún de los principales activos culturales y turísticos d'Asturies y que reflexa la riqueza y diversidá de les tradiciones asturianes. L'Executivu va siguir sofitando la so promoción y fortalecimientu como parte d'un modelu turísticu sostenible, desestacionalizáu y vinculáu al territoriu.
Les once Fiestes d'Interés Turísticu Nacional d'Asturies son: el Festival de la Mazana (Villaviciosa), el Día d'Asturies (Xixón), el Descensu Folclóricu del Nalón (Llaviana), la Fiesta de la Virxe de la Guía (Llanes), el Festival de la Sidra Natural (Nava), el Descensu a Nadu de la Ría (Navia), el Día d'América n'Asturies (Uviéu), el Rally Princesa d'Asturies, la Fiesta del Asturcón (Piloña), La Nuestra Señora del Rosariu (L.luarca) y El Desarme (Uviéu).