Asturies quier ser un paraísu circular

J. S.

ACTUALIDÁ

Participantes en la jornada
Participantes en la jornada

Les empreses químiques esponen el so apueste pola economía circular

21 nov 2019 . Actualizado a las 05:00 h.

Asturies puede convertise nun paraísu circular. Asina lo cree'l Clúster d'Industries Químiques d'Asturies, del que formen parte empreses como ArcelorMittal, Bayer Hispania, Corteva, DuPont, Ence, Fertiberia, Nippon Gases, Química del Nalón o Saint Gobain. Una xornada axuntó n'Avilés a más de 80 investigadores y profesionales de la xestión medioambiental de 40 empreses y entidaes que yá trabayen en soluciones anovadores pal amenorgamientu de residuos o'l so tresformamientu n'usos nuevos.

Margarita Álvarez Fresno, la coordinadora de la Comisión de Medioambiente del Clúster, punxo de manifiestu la oportunidá que la economía circular representa pa toles partes implicaes. Foi Eva Pando, la directora del Idepa, la que compartió'l conceutu de Paraísu Circular: «Un hub de circularidá d'Asturies, como agrupación territorial d'industries conexes, comprometíes col entornu ya infraestructures d'I+D, públiques y privaes. Los grandes oxetivos qu'inspiren la so actuación son cero residuos al vertederu, neutralidá de carbonu y rentabilidá económica».

Paz Orviz, directora Xeneral de Calidá Ambiental del Principáu aludió a la economía circular como un enclín mundial irreversible, que ye la columna vertebral de la estratexa industrial de la UE. Partiendo del conceptu mesmu del aceru como material infinitamente reciclable, Maryll Giordana y Victoria Masaguer, d'ArcelorMittal espunxeron la visión circular de la producción del aceru y les llinies de trabayu empobinaes a la valorización de subproductos y residuos del procesu siderúrxicu, con especial procuru nel casu de la refugaya de l'acería.

Juan Ansedes, de Saint Gobain, céntrase na meyora del diseñu de los productos de la cristalera y la optimización del consumu de los recursos naturales, l'amenorgamientu de la xeneración de residuos n'orixe y la recuperación de los sos productos al acabu de la so vida útil. Pela so parte, Química del Nalón faló del so departamentu d'I+D+i y Fernando Fernández-Tresguerras, de Cementos Tudela Veguín, esplicó que dende fai prácticamente 100 años la compañía vien utilizando nel so procesu productivu refugaya procedente de distintes actividaes industriales.

Ignacio Vigil, presidente del Clúster afirmó que «col marcu oportunu, podemos operar de forma sostenible al amenorgar les emisiones de gases d'efectu invernaderu, collaborar pa la xestión más eficiente de materia primero y del agua y facelo de manera qu'aseguremos la salú de les persones y la protección del medioambiente y favorezamos una cultura de trabayu que valora la diversidá y la inclusión».