El Principáu llama a la cooperación colos conceyos
30 sep 2020 . Actualizado a las 11:51 h.El conseyeru de Mediu Rural del Principáu, Alejandro Calvo, pidió al restu d'alministraciones que sofiten el llabor que realiza'l Principáu pa regular el fluxu masivu de turistes nes zones protexíes d'Asturies, cuantimás nos Picos d'Europa.
Calvo, que contestó nel Plenu de la Xunta Xeneral a una entruga del diputáu d'IX Ovidio Zapico sobro la saturación que provocó problemes de tráficu y masificación qu'esti branu soportaron les zones protexíes de la rexón, reconoció qu'inda queda «muncho que facer» énte la llegada de turistes a estos espacios naturales.
«Hai que falar de competencies. Nós vamos tener qu'ameyorar poniendo más recursos pero nun tenemos cuerpos de seguridá nin dispositivos qu'organicen el tránsitu polo que precisamos que los conceyos y demás alministraciones competentes pongan de la so parte y se doten de recursos necesarios p'ayudar», sorrayó.
Apuntó que l'actual pandemia pola covid-19 influyó nuna mayor llegada a les zones protexíes d'Asturies y que se perpasara la capacidá p'acoyer a tantu turista, pero refugó qu'hubiera «descontrol».
Pela so parte, Zapico señaló «graves problemes de sobresaturación y falta de control» nos espacios naturales mientres el pasáu branu, nel que se produció «desprotección» en dellos monumentos naturales del Principáu.
Per otra parte, y ante una interpellación del diputáu del PP Javier Brea sobro la xestión del Parque Nacional de Picos d'Europa, refugó'l discursu absolutamente «catastrofista» del parllamentariu popular cuando'l parque «evoluciona favorablemente y ye un motor de la economía del oriente asturianu».
El conseyeru comprometió'l so trabayu na llinia de buscar el preséu más eficaz pa que pueda actuase dende cada comunidá autónoma con competencia nel Parque pa, cola mayor axilidá posible, dar respuesta a les necesidaes de la población qu'ellí habita y de l'anovación del Plan Rector d'Usu y Xestión (PRUX) de los Picos d'Europa.
Indicó que'l conceptu de «capacidá d'acoyida» surde como una ferramienta pa establecer los nuevos criterios de xestión del parque sobro oxetivos midibles y rigorosos.
Esta situación, puntualizó, surde énte la saturación de los espacios protexíos y la capacidá d'acoyida del parque, teniendo en cuenta les interacciones que se producen ente los visitantes y los mesmos pobladores d'esti espaciu protexíu.
Calvo resaltó que ta ellaborándose una revisión completa de la xestión integrada nos espacios naturales incluyíos na rede natural 2000.
Esta iniciativa, añedió, cuenta con un ampliu procesu de participación social nel que se ponen les bases d'un modelu nuevu que tenga en cuenta los estándares de les directives européu y nacional nel pactu del clima y la enerxía.
Na so intervención, el diputáu del PP aporfió na so esmolición pola actual situación del Parque, «con un deterioru notable añu tres d'añu».
Brea criticó la defensa del Principáu escontra'l llobu, «en contra de los ciudadanos» qu'habiten el parque, y aseguró que la so presencia ye «incompatible cola ganadería intensiva».
Nesi sentíu, el conseyeru contestó que'l vixente segundu plan del llobu de tien como finalidá'l caltenimientu de la especie nel ámbitu rexonal calteniendo un nivel poblacional fayadizu que seya compatible col desenvolvimientu de les esplotaciones agraries, reduciendo los daños y compensándolos.