La música asturiana enllena'l Teatru de la Llaboral nel homenaxe a Ígor Medio

La Voz

ACTUALIDÁ

Homenaxe a Igor Medio
Homenaxe a Igor Medio

Al escenariu xubieron los grupos Felpeyu, y integrantes de Tuenda, DRD, La Bandina'l Tombo y Corquiéu

05 may 2022 . Actualizado a las 16:48 h.

La escena sonora asturiana enllenó'l Teatru de Llaboral-Ciudá de la Cultura pa homenaxar al músicu y dibuxante de cómic Ígor Medio, nel primer conciertu en gran formatu de la música asturiana depués de la pandemia. El Conciertu d'Ígor Medio, enmarcáu na 43 Selmana de les Lletres Asturianes, dedicada al músicu y dibuxante que morrió nun accidente de carretera nel 2006, cuntó con un públicu entregáu y l'asistencia de la conseyera de Cultura, Política Llingüística y Turismu, Berta Piñán.

Al escenariu xubieron los grupos Felpeyu, y integrantes de Tuenda, DRD, La Bandina'l Tombo y Corquiéu, acompañaos por José Manuel Tejedor, Mapi Quintana, Bree Delian, Alberto Sánchez, Xuan Nel Expósito, Cástor Castro, Félix Castro, Toño Gómez, Xel Pereda y Isidro Suárez.

Los invitaos tocaron repertoriu propiu, de Felpeyu y también del disco d'Ígor Medio y Lisardo Prieto 'Dual', como 'Penouta', con lletra en gallego-asturianu y que cuntó cola participación de dellos integrantes de Corquiéu.

Ente los temes más destacasos que sonaron na Llaboral tuvieron Canteros, con Felpeyu y Mapi Quintana; Llevántate neña, con Felpeyu, Alberto Sánchez y Bree Delian; El vieyu, con Felpeyu y Ambás; o Los fayeos de mayo, cantar valoráu como'l meyor de la música asturiana y que los miembros de Felpeyu interpretaron xunto a José Manuel Tejedor y Xel Pereda, cantante que grabó una versión d'esti tema col so grupu Lucas 15, onde xunto a Nacho Vegas versionó temes tradicionales pa llevalos al terrén del pop-rock.

Depués vinieron los bises reclamaos por un públicu qu'agradeció cada tema y qu'aprovechó'l momentu pa reclamar la oficialidá de la llingua asturiana. Salieron entós al escenariu tolos invitaos pa interpretar xunto a Felpeyu 'Alboraes' y 'Tierra', que punxo'l ramu a un conciertu que yá forma parte de la historia de la música asturiana.

El domingu, 8 de mayu, a les 23.00 hores, va haber otra oportunidá de volver a ver El Conciertu d'Ígor Medio, porque va emitise al traviés de la pantalla de la TPA.

Ígor Medio

El dibuxante, guionista de cómic y músicu Ígor Medio (1972-2006) realizó cola so estensa obra una contribución esencial al cómic n'Asturies, creando mundos qu'inda perviven nel imaxinariu colectivu, ente los que destaca la familia Castañón, protagonista d'una tira cómica que se publicó ente 1997 y 2005 nel suplementu de branu del diariu La Nueva España.

Collaborador en fanzinos y revistes como El Llapiceru, El Wendigo o Esquit y corresponsable de cómics de sonadía como Love Gun, en 1991 Ígor Medio fundó xunto al percusionista y compañeru d'estudios Ruma Barbero'l grupu de folk Felpeyu, que col tiempu diba convertise nun referente de la música asturiana. L'artista xixonés desenvolvió tamién un trabayu intensu como productor de discos d'artistes y grupos asturianos como Flavio Rodríguez, Gatos del Fornu o Tejedor.

Nel 2003 punxo en marcha'l sellu editorial Tierra, nel que diba apaecer el so llibru recopilatoriu de la familia Castañón, Too Castañón. Ígor Medio morrió nel 2006 nun accidente de carretera nel que falleció tamién Carlos Redondo, compañeru d'él en Felpeyu.